OLIGARKU MOLDAV VLADIMIR PLAHOTNIUK (PLAHOTNIUC) DHE ISH-LIGJVËNËSI KONSTANTIN (CONSTANTIN) ȚUȚU U ARRESTUAN GJATË FUNDJAVËS NË AEROPORTIN NDËRKOMBËTAR TË ATHINËS.

Athinë, Greqi | Manjati moldav Vladimir Plahotniuk (Plahotniuc) dhe ish-ligjvënësi Konstantin (Constantin) Țuțu u arrestuan gjatë fundjavës në Aeroportin Ndërkombëtar të Athinës, ndërsa dyshohet se po përpiqeshin të iknin për në Dubai duke përdorur identitete të rreme, sipas policisë greke dhe dokumenteve të siguruara nga Rise Moldova.

Autoritetet greke vonuan nisjen e fluturimit me destinacion Dubain për të kapur dy burrat, të cilët, kishin qëndruar në një vilë luksoze në qytetin bregdetar të Saronidës, në jug të Athinës.

Z. Plahotniuk, dikur një nga figurat politike më të fuqishme të Moldavisë, kërkohet nga prokurorët moldavë me akuzat për krijimin dhe drejtimin e një organizate kriminale, mashtrim dhe pastrim parash në shkallë të gjerë, përfshirë në lidhje me të ashtuquajturin “Mashtrim Bankar prej Miliardë Dollarësh” që shkatërroi sistemin financiar të vendit midis viteve 2013 dhe 2015.

Arrestimi i tij vjen pas një njoftimi të ripërtërirë të Interpolit të lëshuar me kërkesë të Moldavisë.

Z. Tuțu, një ish-anëtar i parlamentit dhe bashkëpunëtor i ngushtë i z. Plahotniuk, thuhet se u ndalua me kërkesë të Rusisë bazuar në një alarm të veçantë të Interpolit.

Sipas një raporti të brendshëm nga Divizioni i Krimit të Organizuar të Policisë Greke, të siguruar nga Rise Moldova, dyshja u kap menjëherë pasi mbërritën në aeroport vetëm me çanta shpine në dorë.

Policia greke tha se z. Plahotniuk mbante dokumente udhëtimi të lëshuara me një identitet të rremë bullgar, mbi 2000 euro (2347 dollarë) në para të thata, dy telefona celularë dhe një laptop.

Z. Țuțu u gjet me dokumente të falsifikuara rumune dhe një sasi të ngjashme parash.

Një kontroll i vilës në rrugën Ifaistou zbuloi një mori provash, duke përfshirë 155000 euro (181890 dollarë) në monedha të ndryshme, 17 pasaporta dhe dokumente identifikimi nga vende të ndryshme, disa pajisje të koduara për ruajtjen e të dhënave dixhitale, pajisje elektronike të nivelit të lartë dhe katër ora luksoze nga Breguet, Kees Engelbarts dhe Urwerk.

Autoritetet sekuestruan gjithashtu një Skoda Kodiaq SUV të përdorur ekskluzivisht nga z. Plahotniuk.

Vila me katër kate, prej 1400 metrash katrorë - e përshkruar nga faqet e internetit të pasurive të paluajtshme si ndër rezidencat më të mëdha private në zonë - krenohet me tetë dhoma gjumi me banjo brenda, një pishinë infinity me pamje nga Deti Egje, një shtëpi private për mysafirë, një bodrum vere dhe një palestër të pajisur me hamam.

Dokumentet e shqyrtuara nga Rise tregojnë se prona është blerë në vitin 2008 nga qytetarë grekë dhe i është dhënë me qira z. Plahotniuk.

Zyra e Prokurorit Antikorrupsion të Moldavisë konfirmoi të dielën se ishte informuar për arrestimin e z. Plahotniuk nëpërmjet kanaleve ndërkombëtare të bashkëpunimit policor dhe po përgatit kërkesa zyrtare për ekstradim.

Z. Plahotniuk iku nga Moldavia në muajin qershor të vitit 2019, mes një ndryshimi dramatik të pushtetit në vend.

Menjëherë pas kësaj, prokurorët moldavë kërkuan që Interpoli të lëshonte një Njoftim të Kuq për arrestimin e tij.

Megjithatë, alarmi u hoq më vonë pas kundërshtimit ligjor të z. Plahotniuk dhe vendndodhja e tij mbeti e panjohur për vite me radhë.

Pas presionit të ripërtërirë dhe provave shtesë të paraqitura nga autoritetet moldave, Interpoli thuhet se e rivendosi alarmin në fillim të këtij viti.

I kontaktuar nga Rise Moldova, avokati i z. Plahotniuk, Lukian Rogak (Lucian Rogac), tha se synon ta kundërshtojë vendimin, duke pretenduar se ai bazohet në informacion të rremë të dhënë nga prokurorët moldavë.

“Kemi prova të qarta që vërtetojnë se vendimi i Interpolit në rastin e z. Vladimir Plahotniuc mbështetet në të dhëna mashtruese”, tha z. Rogac, duke shtuar se ata do të kërkojnë një përmbysje të alarmit të arrestimit.

Sipas prokurorëve moldavë, z. Plahotniuk aktualisht përballet me tre urdhër-arreste të vlefshme dhe është nën hetim penal paraprak në raste të shumta.

Njëri prej tyre lidhet me skemën e mashtrimit multimiliardë dollarëshe që dyshohet se ka nxjerrë mbi 1 miliard dollarë nga sektori bankar dhe buxheti shtetëror i Moldavisë.

Autoritetet gjyqësore greke pritet të vendosin së shpejti nëse do ta mbajnë dyshen në pritje të procedurave të ekstradimit.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit