PORTALI NORVEGJEZ “THE BARENTS OBSERVER”: RUSIA PLANIFIKON TË TESTOJË RAKETA ME ENERGJI BËRTHAMORE NË ARKTIK PËRPARA TAKIMIT TË ALASKËS.

Moskë, Federata Ruse | Udhëheqësi i Kremlinit, Putin, e ka lavdëruar vazhdimisht raketën e re Burevestnik, e cila, mund t’i shmanget sistemeve të mbrojtjes ajrore, por deri më tani testet kanë qenë kryesisht të pasuksesshme.

Sipas një raporti, Rusia mund të jetë gati të kryejë një tjetër provë të raketës bërthamore “Burevestnik” (emri i koduar i NATO-s: Skyfall) në poligonin e testimit të arkipelagut Novaia Zemlia (Novaya Zemlya).

Kjo raportohet nga portali norvegjez “The Barents Observer”.

Arkipelagu Arktik në pronësi ruse ndodhet midis Detit Barenc dhe Detit Kara, rreth 900 kilometra në verilindje të Norvegjisë kontinentale.

Sipas raportit, hapësira ajrore mbi një korridor 500 kilometrash përgjatë bregdetit perëndimor të ishujve ishte e mbyllur nga e enjtja e kaluar deri të martën e ardhshme.

Disa anije ruse kanë transportuar pajisje në zonë në javët e fundit dhe tani ndodhen në pikat e vëzhgimit.

Përveç kësaj, dy avionë nga Agjencia Federale Ruse e Energjisë Atomike (Rosatom) janë aktualisht të stacionuar në bazën ushtarake Rogaçevo në jugperëndim të arkipelagut.

Sipas raportit, avionë të tillë kanë mbështetur teste të ngjashme në të kaluarën.

Për më tepër, një avion ushtarak amerikan WC-135R Constant Phoenix u pa mbi Detin Barenc, sipas portalit “The Barents Observer”.

Avioni nganjëherë quhet detektor bërthamor ose analizues bërthamor.

Është një avion i pajisur posaçërisht që merr mostra ajri për të matur përqendrimin e grimcave radioaktive në atmosferë - një tregues që mund të tregojë në mënyrë indirekte se po kryhen teste.

“Burevestnik” (anglisht: “Zogu i Stuhisë”) u përmend për herë të parë publikisht nga Presidenti rus Vladimir Putin në vitin 2018.

Në atë kohë, udhëheqësi i Kremlinit tha se Perëndimi nuk kishte mjete për t’u mbrojtur kundër kësaj arme.

Mund të fluturonte ulët dhe të sulmonte objektivin e saj nga drejtime të ndryshme, duke shmangur kështu sistemet e mbrojtjes ajrore.

Raketa lundruese thuhet se është rreth dhjetë metra e gjatë dhe peshon deri në gjashtë ton, është e aftë të pajiset me një kokë bërthamore dhe ndoshta fuqizohet nga një reaktor i vogël bërthamor i ftohur me ajër.

Sipas ekspertëve, kjo do të lejonte një rreze veprimi prej më shumë se 25000 kilometrash.

Gjatë fluturimit, raketa mund të linte pas një gjurmë radioaktive.

“Burevestnik” është testuar në Novaia Zemlia, ndoshta që nga viti 2017, por deri më tani, me sa duket ka pasur pak sukses.

Në vitin 2019, një shpërthim ndodhi gjatë një prove që vrau pesë punonjës të Rosatom-it dhe, sipas burimeve amerikane, lëshoi substanca radioaktive.

Agjencitë norvegjeze të inteligjencës kanë paralajmëruar për vite me radhë se teste të tilla mbartin rreziqe aksidentesh dhe emetimesh radioaktive.

Sipas agjencive amerikane të inteligjencës, fluturimi më i gjatë i një “Burevestnik” deri më sot zgjati vetëm dy minuta dhe asnjë version prove nuk ka fluturuar më shumë se 35 kilometra.

Testi i mundshëm i raketës - nëse zhvillohet në ditët në vijim - do të ndodhë vetëm disa ditë para se Presidenti i ShBA-ës Danlld Tramp (Donald Trump) dhe udhëheqësi i Kremlinit Vladimir Putin të takohen në Alaskë.

Atje, të dy, do të diskutojnë një përfundim të mundshëm të luftës në Ukrainë.

Do të ishte takimi i parë i drejtpërdrejtë midis dy krerëve të shteteve që nga fillimi i pushtimit rus.

Mbetet e paqartë nëse Moska po e tregon qëllimisht fuqinë e saj përpara samitit me provën.

“Rusia ka edhe armë të tjera me teknologji të lartë përveç Oreshnikut”, tha një diplomat i lartë rus.

“Oreshnik - po, por ne kemi armë të tjera. Nuk humbëm kohë”, tha zëvendësministri i Jashtëm Sergei Riabkov në një intervistë me kanalin televiziv “Rossiya-1”.

“Nuk mund të komentoj për atë që nuk duhet të bëjmë, por ne kemi armë të tilla”, tha ai kur iu kërkua të ndante detaje.

Duke komentuar mbi vendosjen e mundshme të armëve ruse në zona të reja, z. Riabkov vuri në dukje se:

1- “Do të ishte absolutisht e gabuar dhe e papërgjegjshme nga ana ime të zbuloja vendndodhje specifike gjeografike.

Ne gjithmonë kemi shumë mundësi në tryezë dhe nuk përjashtojmë kurrë asgjë për veten tonë”.

Presidenti rus Vladimir Putin tha më 21 nëntor se Shtetet e Bashkuara dhe aleatët e tyre në NATO kishin njoftuar miratimin e tyre për përdorimin e armëve me precizion të gjatë.

Pas këtij njoftimi, instalimet ushtarake ruse në rajonet Kursk dhe Briansk u sulmuan nga raketa amerikane dhe britanike.

Në përgjigje, Rusia përdori raketën e saj më të re balistike me rreze të mesme, Oreshnik, në një sulm jo-bërthamor që synonte uzinën mbrojtëse Yuzhmash të Ukrainës në Dnipro (i njohur më parë si Dnipropetrovsk).

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit