UNICEF: 35 MIJË PËRDHUNIME TË TË MITURVAVE NË REPUBLIKËN DEMOKRATIKE TË KONGOS DERI NË VITIN 2025; DHUNA SEKSUALE ËSHTË ENDEMIKE DHE SISTEMIKE NË RRITJE QË NGA VITI 2022.

Jorku i Ri, Amerikë | “Dhuna seksuale ndaj fëmijëve është endemike, sistemike dhe në rritje në të gjithë Republikën Demokratike të Kongos (RDK)”.

Kështu thuhet sipas një raporti të ri të UNICEF-it.

Ndërsa konflikti mbetet një nxitës kryesor, raporti tregon se rastet e dokumentuara në komunitete në të gjitha provincat janë rritur ndjeshëm që nga viti 2022.

Të dhënat kombëtare të mbledhura nga ofruesit e mbrojtjes dhe mbështetjes nga dhuna me bazë gjinore tregojnë se mbi 35000 raste të dhunës seksuale ndaj fëmijëve u regjistruan në nëntë muajt e parë të vitit 2025, duke nxjerrë në pah një krizë që vazhdon të përkeqësohet.

Në vitin 2024, u regjistruan gati 45000 raste, që përbëjnë gati 40% të të gjitha rasteve të raportuara të dhunës seksuale - tre herë më shumë se në vitin 2022.

Këto shifra, sipas UNICEF-it, tregojnë një fenomen të vazhdueshëm dhe të përhapur, me numrin aktual të viktimave që ka të ngjarë të jetë shumë më i lartë për shkak të raportimit të pamjaftueshëm, pasi frika, stigma, pasiguria dhe qasja e kufizuar në shërbime i pengojnë shumë të mbijetuara të raportojnë ose të kërkojnë ndihmë.

Punonjësit socialë përshkruajnë nënat që ecin me orë të tëra për të arritur në klinika me vajzat e tyre që nuk janë në gjendje të ecin pasi janë përdhunuar.

“Familjet thonë se frika nga stigma dhe hakmarrja shpesh i pengon ata të raportojnë abuzimin”, tha znj. Kethrin Rasll (Catherine Russell), Drejtore Ekzekutive e UNICEF-it.

Histori të tilla përsëriten në të gjitha provincat, duke nxjerrë në pah një krizë të thellë të shkaktuar nga pasiguria, pabarazia dhe sistemet e dobëta të mbështetjes.

Shumica e rasteve janë të përqendruara në Kivu-në Veriore, Kivu-në Jugore dhe Ituri, ku konflikti, zhvendosja dhe sistemet e dobësuara të mbrojtjes paraqesin rreziqe ekstreme.

Megjithatë, një numër i konsiderueshëm rastesh janë dokumentuar edhe në Kinshasa dhe Kasai, ku varfëria, pasiguria ushqimore dhe braktisja e shkollës rrisin ndjeshmërinë e vajzave ndaj shfrytëzimit dhe martesës së hershme.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit