AUTORITETET FEDERALE AMERIKANE MORËN VENDIM PËR NDALIMIN E IMPRORTIMIT DHE SHITJES SË DRONËVE TË PRODHUAR JASHTË VENDIT PËR SHKAK SE CENOJNË SIGURINË KOMBËTARE DHE ATË TË QYTETARËVE.

Uashington, Amerikë | Komisioni Federal i Komunikimeve (FCC) i ShBA-ës ka vendosur të ndalojë shitjen dhe importimin në Shtetet e Bashkuara të dronëve të rinj të prodhuar jashtë vendit dhe komponentëve kritikë, bazuar në konsiderata të sigurisë kombëtare.

Masa nuk zbatohet për produktet që shiten tashmë në tregun amerikan.

Në një deklaratë zyrtare, agjencia shpjegoi se sistemet ajrore pa pilot (UAS) të prekura paraqesin një rrezik të papranueshëm për sigurinë kombëtare të Shteteve të Bashkuara ose për sigurinë e njerëzve në Shtetet e Bashkuara.

Autoriteti e lidhi vendimin me nevojën për të mbrojtur hapësirën ajrore përpara ngjarjeve të mëdha ndërkombëtare, të tilla si Kupa e Botës FIFA 2026 dhe Lojërat Olimpike dhe Paralimpike 2028, si dhe kërcënimet e paraqitura nga kartelet kriminale, grupet terroriste dhe qeveritë e huaja.

Sipas FCC-së, lejimi i shitjes së dronëve të prodhuar jashtë vendit dobëson qëndrueshmërinë e bazës industriale të ShBA-ës, rrit rreziqet për hapësirën ajrore vendase dhe krijon potencialin për sulme në shkallë të gjerë ndaj tubimeve të mëdha.

Masa zbaton Seksionin 1709 të Aktit të Autorizimit të Mbrojtjes Kombëtare të vitit 2025 dhe gjithashtu prek produktet nga DJI, një kompani kineze që mban shumicën e tregut global të dronëve.

Një zëdhënës i DJI-it i tha entit mediatik “The Hill” se ata ishin të zhgënjyer nga vendimi, duke shtuar se asnjë informacion nuk është bërë publik në lidhje me faktorët që janë përdorur për të përfshirë produktet e kompanisë në listën e mallrave të ndaluara.

“Produktet DJI janë ndër më të sigurtat në treg”, tha zëdhënësi, duke cituar rishikime të kryera nga agjencitë qeveritare të ShBA-ës dhe palët e pavarura.

Vendimi u mirëprit nga Komiteti i Posaçëm i Dhomës së Përfaqësuesve për Partinë Komuniste të Kinës, i cili, në platformën sociale virtuale Iks (X) shprehu mbështetje të fortë për masën, duke deklaruar se ndalimi do të ndihmojë në mbrojtjen e sigurisë kombëtare dhe në zvogëlimin e kërcënimit të papranueshëm që paraqesin DJI-ja dhe dronët e tjerë kinezë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit