UKRAINË | KOLONELI I SHËRBIMIT SEKRET IVAN VORONIÇ (VORONYCH) U VRA NË MES TË RRUGËS.

Kiev, Ukrainë | Një agjent i Forcave të Sigurisë së Ukrainës (SBU) u vra në mes të rrugës dje (e enjte) në kryeqytetin ukrainas.

Në një video, një burrë me kapuç shihet duke vrarë me gjakftohtësi një person pranë një parkingu dhe më pas duke ikur.

Sipas medias së pavarur ukrainase “Ukrainska Pravda”, viktima ishte koloneli Ivan Voroniç (Voronych).

I dyshuari e qëlloi viktimën pesë herë me një pistoletë të pajisur me silenciator, raportoi gjithashtu media, duke cituar burime në SBU.

“Një hetim penal është nisur për vdekjen e një punonjësi të SBU-së në lagjen Kholosivskyi të Kievit”, tha SBU-ja në një deklaratë për agjencinë franceze të lajmeve “AFP”, pa specifikuar identitetin e saktë të viktimës.

“Shërbimet e sigurisë dhe policia ukrainase po marrin të gjitha masat e nevojshme për të përcaktuar rrethanat e krimit dhe për të sjellë përgjegjësit para drejtësisë”, tha burimi.

“Forcat e zbatimit të ligjit që mbërritën në vendngjarje zbuluan trupin e një burri që kishte pësuar një plagë me armë zjarri”, sqaroi policia nga ana e saj.

Sulme të tilla gjatë ditës janë të rralla në Kiev, edhe pas fillimit të pushtimit rus në shkurt të vitit 2022.

Për më shumë se tre vjet, ukrainasit dhe rusët e kanë akuzuar rregullisht njëri-tjetrin për vrasje të organizuara, kryesisht politike.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit