SI DHE PSE DËSHTOI VRASJA E XHEVDET PLAKUT KUR DOLI NGA DERA E KOMISARIATIT?

Tiranë, Shqipëri | Nga dosja hetimore e Prokurorisë Kundër Korrupsionit dhe Krimit të Organizuar (SPAK) u publikuan disa materiale për z. Rexhep Rapi, i njohur si Kep Arapi, i cili, dyshohet se u përpoq të vriste kundërshtarin e tij në fushën e tregtimit të drogërave, z. Xhevdet Plaku (i njohur në qarqet kriminale si “Akili”), për motive që lidheshin me hakmarrjen.

Z. Kep Arapi e akuzonte z. Xhevdet Plaku si autor të vrasjes së vëllait të tij, z. Sali Rapi, ngjarje kriminale e ndodhur në vitin 2000, në Savona, në Itali.

Kur oficeri i Policisë Gjyqësore Dedan Gjoni informoi se do ta nxirrte z. Plaku nga dera e pasme e komisariatit të Durrësit, z. Kep Arapi organizoi grupin e armatosur, me qëllim që ta vriste.

“Mbas sinjalizimit që shtetasi Dejvi Gjermëni, i ka dhënë personit të quajtur Geri (identifikuar si Algert Rapi), Rexhep Rapi (Kep Arapi) është organizuar me njerzit e tij për të kryer vrasjen e shtetasit Xhevdet Plaku”, thuhet në dosje.

Vrasja nuk u realizua, pasi z. Gjermëni i kërkoi z. Algert Rapi, nipit të z. Kep Arapi, që ky i fundit dhe njerëzit e tij të tërhiqeshin, nga frika se mos zbuloheshin, pasi z. Dedan Gjoni ia kishte përcjellë të dhënat në aplikacionin whatsup, dhe jo në telefon të koduar (enkriptuar).

Në një bisedë të të përgjuar, z. Gjermëni dëgjohet ti thotë z. Algert Rapit: “Çfarë bën ai kështu o burrë, ne nuk e lamë kështu”. “Thuaj atyre (me kallashnikov) të ikin se ai (Plaku) nuk është më aty në rajon, e kanë liruar”, dëgjohet ti thotë z. Gjermëni - nipit të z. Kep Arapi.

Bisedat mes tyre u përgjuan nga autoritetet holandeze të hetimit dhe ndjekjes penale, të cilat, po hetonin z. Dejvi Gjermëni, për përfshirje në një organizatë kriminale, që kultivonte bimë narkotike.

Në këtë kuadër hetimesh paraprake z. Gjermëni u vëzhgua në çdo lëvizje, dhe u përgjua teksa bisedonte me persona të ndryshëm, në ambjentet e biznesit të tij.

“Në periudhën nga fillimi i muajit mars të vitit 2020, deri në fund të muajit shtator po të vitit 2020, në ambientet e firmës ‘Alba Cars’ sh.p.k, nga z. Dejvi Gjermëni është folur disa herë dhe me persona të ndryshëm për një vrasje, për të cilën, janë siguruar kushtet dhe mjetet materiale për ta realizuar në verën e vitit 2019, në Shqipëri”, thuhet në përmbajtjen e akteve proceduriale penale që gjenden në dosje hetimore.

Planet ai ia rrëfen z. Toni Dervishi, i cili, u ekzekutua në Durrës, disa muaj më parë, ndërsa i tregon detaje se ishte z. Dedan Gjoni që e nxori në pritë z. Xhevdet Plaku.

Ai flet edhe për takime mes zyrtarit të policisë dhe të fortit të Sukthit, z. Kep Arapi, në lokalin e këtij të fundit, te Gjiri i Lalzit.

Vrasja e z. Xhevdet Plaku ishte planifikuar të realizohej në datën 17 shtator 2019, në Durrës, kur ai ishte shoqëruar në komisariat, nga oficeri i Policisë Gjyqësore Dedan Gjoni, me pretendimin se përdorte makinë të blinduar.

Sipas SPAK z. Rexhep Rapi, i njohur si Kep Arapi, nipi i tij, z. Algert Rapi, z. Dejvi Gjermëni, i njohur edhe me emrat Elton dhe Sako Gjermëni, si dhe oficeri i Policisë Gjyqësore, Dedan Gjoni, krijuan kushtet për vrasjen e z. Plaku, për motive hakmarrje, por plani dështoi, sepse komunikimi mes tyre, u konsiderua i dekonspiruar, nga ata vetë. Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë. Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit