NË HANOI U FESTUA 35-VJETORI I MARRËDHËNIEVE VIETNAM-BASHKIMI EVROPIAN.

Hanoi, Vietnam | “Zv/Kryeministri vietnamez Tran Hong Ha u takua me ambasadorët e Bashkimit Evropian në Hanoi me rastin e 35-vjetorit të vendosjes së marrëdhënieve diplomatike me vendin aziatik”.

Kështu raporton enti mediatik “Vietnam News”.

Duke theksuar zhvillimet pozitive në partneritet dhe bashkëpunim, Zv/Kryeministri përmendi në veçanti rritjen e ndjeshme tregtare që nga hyrja në fuqi e Marrëveshjes së Tregtisë së Lirë BE-Vietnam (EVFTA) në vitin 2019, me tregtinë që u rrit me një mesatare prej 10-15% në vit dhe investimet direkte evropiane që tejkaluan 30 miliardë dollarë.

Pavarësisht sfidave që lidhen me fatkeqësitë natyrore, Vietnami, i cili, kohët e fundit tejkaloi rekordin e 20 milionë turistëve ndërkombëtarë në vitin 2025, ka zbatuar reforma të shumta në shkencë dhe teknologji, kujdes shëndetësor, arsim dhe sektorin privat.

Bashkimi Evropian shprehu qëllimin e tij për ta ngritur marrëdhënien e tij me Hanoi-n në një partneritet strategjik gjithëpërfshirës, duke forcuar bashkëpunimin në EVFTA-n, infrastrukturën, tranzicionin e gjelbër dhe dixhital dhe zhvillimin e qëndrueshëm.

Zv/Kryeministri Tran Hong Ha theksoi rëndësinë e bashkëpunimit në zhvillimin e qëndrueshëm detar, si në aspektin e kërkimit ashtu edhe të mbrojtjes së mjedisit, duke përfshirë luftën kundër peshkimit të paligjshëm, dhe bëri thirrje për lidhje më të forta në sektorët e akuakulturës dhe turizmit detar.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit