STAMBOLL | POLICIA QËLLOI ME TOPA DHE ME GAZ LOTSJELLËS KUNDËR PROTESTUESVE TË PARTISË REPUBLIKANE POPULLORE (CUMHURIYET HALK PARTISI); DISA TË PLAGOSUR DHE DISA TË ARRESTUAR.

Stamboll, Turqi | Policia kundër trazirave përdori topa uji dhe gaz lotsjellës për të shpërndarë një grup protestuesish në selinë e partisë më të madhe opozitare të Turqisë, Partisë Republikane Popullore (Cumhuriyet Halk Partisi) - CHP - në Stamboll.

Sipas mediave të ndryshme turke, disa veta u arrestuan, ndërsa disa protestues u plagosën gjatë përleshjeve me policinë.

Protesta ka vazhduar që nga mbrëmja e djeshme dhe demonstruesit, përfshirë ligjvënësit e CHP-së, po kundërshtojnë një vendim të një gjykate të Stambollit javën e kaluar që anuloi rezultatet e kongresit krahinor të partisë të vitit 2023 për shkak të mashtrimit.

Kjo hoqi kryetarin e degës së partisë në qytetin Bosfor dhe 196 delegatë të tjerë të zgjedhur në të njëjtin kongres.

Oficerët e zbatimit të ligjit rrethuan selinë e CHP-së mbrëmë, ndërsa qasja dhe përdorimi i rrjeteve kryesore sociale virtuale dhe shërbimeve të mesazheve të Turqisë ka qenë i bllokuar ose problematik për më shumë se 12 orë dhe prefektura e Stambollit ka ndaluar demonstratat në disa lagje deri më 10 shtator.

Tensionet me forcat e rendit u përshkallëzuan kur z. Gursel Tekin, një ish-anëtar i CHP-së, mbërriti në selinë e partisë.

Z. Tekin u emërua president i përkohshëm i degës së Stambollit pas shkarkimit të udhëheqjes së mëparshme, një vendim i kontestuar fuqimisht nga anëtarët e partisë.

Që nga fundi i vitit të kaluar, CHP-ja ka qenë në qendër të disa hetimeve, përfshirë një hetim për korrupsion që çoi në arrestimin e kryetarit të bashkisë së Stambollit Ekrem Imamoglu, i konsideruar si rivali kryesor i Presidentit Rexhep Tajip Erdogan, dhe zyrtarëve dhe punonjësve të tjerë bashkiakë, duke shkaktuar protesta masive në rrugë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit