SHBA-ës | TRE TË VRARË NGA TË SHTËNAT NË QENDRËN ISLAMIKE NË SHËN DIEGO; DY SULMUESIT KRYEN VETËVRASJE.

Shën Diego, Amerikë | Të shtënat me armë në xhaminë më të madhe të Shën Diegos lanë tre të vdekur, përveç dy sulmuesve, 17 dhe 19 vjeç, të cilët u gjetën të vdekur nga plagët e vetëshkaktuara brenda një makine të parkuar disa blloqe më tutje.

Hetimi është në fazat fillestare dhe policia po ndihmohet nga FBI-ja për të hedhur dritë mbi një rast që aktualisht konsiderohet si krim urrejtjeje.

Megjithatë, incidenti vjen në një kohë tensionesh të larta për shkak të luftës në Iran.

Alarmi u dha pak pas mesditës sipas orës vendore. Oficerët mbërritën në vendngjarje brenda katër minutash nga telefonata e parë emergjente.

Brenda pak minutash, policia mori një tjetër alarm disa blloqe më larg; të shtëna të tjera.

Një kopshtar që ishte në punë i shpëtoi mrekullisht sulmit. Sulmuesit më pas ecën disa metra më tej dhe hynë në një makinë, ku më vonë u gjetën të vdekur.

Një bidon benzine me një afishe të dukshme naziste SS u gjet gjithashtu në tokë.

Hetuesit gjetën mesazhe anti-islamike në makinën ku u gjetën dy sulmuesit, të cilët më vonë vdiqën.

Njëri nga dy të dyshuarit kishte marrë një armë nga shtëpia e prindërve të tij pak para sulmit dhe kishte lënë një shënim vetëvrasjeje.

Nëna e njërit prej sulmuesve kontaktoi policinë para sulmit dhe raportoi se armët ishin vjedhur nga shtëpia e saj dhe se edhe djali i saj ishte zhdukur.

Djali, raportoi nëna e tij, kishte ndërmend të kryente vetëvrasje.

Sipas një burimi të zbatimit të ligjit të cituar nga enti mediatik vendor “New York Post”, autorët e dyshuar të të shtënave që vranë tre persona jashtë një xhamie në Shën Diego janë identifikuar si Kein Kllark (Cain Clark), me moshë 17 vjeç, dhe Kaleb Velaskuez (Caleb Velasquez), me moshë 18 vjeç.

Tre viktimat në qendrën islamike janë burra, përfshirë një roje sigurie i cili, sipas policisë, luajti një rol vendimtar në parandalimin e një tragjedie edhe më të madhe.

Ai ishte baba i tetë fëmijëve, kujdesej shumë për komunitetin e tij dhe sakrifikoi jetën e tij për të mbrojtur ata që ishin brenda xhamisë, tha një mik i tij për mediat amerikane.

Pamjet që qarkullonin tregonin një reagim masiv të policisë, me dhjetëra automjete që rrethonin ndërtesën dhe siguroheshin që të gjithë fëmijët që ndiqnin mësimet në shkollën Al Rashid aty pranë të evakuoheshin në mënyrë të sigurt.

“Fëmijët janë të gjithë të sigurt”, ishin fjalët e para të Shefit të Policisë Skot Uahall (Scott Wahl).

Të paktën 100 oficerë kontrolluan xhaminë pas të shtënave për t'u siguruar që ishte e sigurt në një ditë relativisht të qetë, pa turmat e lutjeve të së premtes.

Motivet e sulmit janë të paqarta, por vëzhguesit theksojnë se fakti që sulmuesit me shumë mundësi i kanë marrë jetën vetes nuk është një shenjë e mirë.

Presidenti Danlld Tramp (Donald Trump) është informuar për incidentin dhe po ndjek zhvillimet.

Drejtori i FBI-së, Kash Patel, ka siguruar se të gjitha burimet do të vihen në dispozicion për të ndihmuar partnerët vendas në hetim.

Incidenti vjen në një kohë tensionesh të larta me luftën në Iran. Në mars, u sulmua një sinagogë në Miçigan. Tani, është sulmuar një xhami.

Imami dhe drejtori i Qendrës Islamike të Shën Diegos kanë bërë thirrje për tolerancë fetare, duke deklaruar se të gjithë janë përgjegjës për krijimin e një kulture dashurie.

“Ajo që mund të them tani është se komuniteti im është në zi”, tha Imami Taha Hassane gjatë një konference për shtyp.

“Është diçka që nuk e prisnim kurrë, por në të njëjtën kohë, intoleranca dhe urrejtja fetare që për fat të keq ekziston në kombin tonë është e pashembullt. Jam e indinjuar nga të shtënat. Vendet e adhurimit duhet të jenë vende të shenjta, ku urrejtja dhe dhuna nuk kanë vend”.

Kështu tha kryetarja e bashkisë së Los Anxhelosit, Karen Bass.

Qyteti i Jorkut të Ri, i cili ka kryetarin e parë mysliman në histori, Zohran Mamdani, në vend të kësaj ka forcuar sigurinë në xhami si masë paraprake, edhe pse nuk ka kërcënime.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit