“RRUGA E ARBËRIT”; KLOS | U ARRESTUA LUAN HASI I LINDUR NË KOSOVË ME BANIM NË TIRANË; TREGTAR DROGE.

“Rruga e Arbërit”, Klos, Shqipëri | Strukturat vendore të Policisë së Shtetit arrestuan:

1- Z. Luan Hasi, me moshë 36 vjeç, lindur në Krahinën shqiptare të Kosovës (Republika e Kosovës), me banim në Tiranë.

Ai akuzohet si tregtar droge.

Njoftim | Klos, Dibër/ Finalizohet operacioni policor i koduar “Pritja”, për goditjen e një rasti të tentativës për shitje të drogave të forta.

Po priste për t’i shitur një shtetasi, një sasi lënde narkotike kokainë, kapet dhe vihet në pranga 36-vjeçari kosovar, me banim në Tiranë.

Sekuestrohet në cilësinë e provës materiale, një pako me lëndë narkotike kokainë.

Vijon puna për identifikimin dhe kapjen e personit që do të blinte lëndën narkotike.

Specialistët e Seksionit për Hetimin e Narkotikëve dhe Trafiqeve në Drejtorinë Vendore të Policisë Dibër, në vijim të punës për parandalimin dhe goditjen e tentativave për shpërndarje të lëndëve narkotike, bazuar dhe në informacionet e siguruara, kanë organizuar dhe finalizuar operacionin policor të koduar “Pritja”.

Në kuadër të operacionit, në Rrugën e Arbërit, në qytetin e Klosit, shërbimet e Policisë kanë konstatuar, kapur dhe arrestuar shtetasin L. H., 36 vjeç, lindur në Kosovë dhe banues në Tiranë.

Gjatë kontrollit të automjetit, shërbimet e Policisë kanë gjetur një pako me lëndë narkotike të dyshuar kokainë, të cilën ky shtetas po priste t’ia shiste një shtetasi me të cilin kishte bërë marrëveshje më parë.

Specialistët e Seksionit për Hetimin e Narkotikëve dhe Trafiqeve në Drejtorinë Vendore të Policisë Dibër, në bashkëpunim me Prokurorinë, po vijojnë punën për identifikimin dhe kapjen e personit që do të blinte lëndën narkotike.

Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprën penale “Prodhimi dhe shitja e narkotikëve”, thuhet në njoftimin e Policisë së Shtetit.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit