RASTET E HIV-it NË USHTRINË RUSE JANË RRITUR ME SHPEJTËSI QË NGA FILLIMI I KONFLIKTIT | SHAKQET: TRANSFUZIONET E GJAKUT NË SPITALET FUSHORE + MARRËDHËNIET SEKSUALE TË PAMBROJTURA + PËRDORIMI I DROGËS.

Berlin, Republika Federale e Gjermanisë | Disa ushtarë jetojnë çdo ditë sikur të ishte e fundit, sipas një instituti kërkimor të pavarur.

Transfuzionet e gjakut në spitalet fushore, por edhe marrëdhëniet seksuale të pambrojtura dhe përdorimi i drogës nga ushtarët mund ta shpjegojnë këtë rritje.

Ndërsa trupat ruse kanë pësuar viktima masive në Ukrainë që nga fillimi i luftës, ato po përballen gjithashtu me një armik të papritur.

Shkalla e infeksionit me HIV midis tyre po rritet ndjeshëm, sipas një raporti nga  Carnegie Politika, një institut kërkimor i pavarur mbi Rusinë me seli në Berlin, i cili mbledh të dhëna nga Ministria e Mbrojtjes.

Numri i rasteve të reja të HIV të zbuluara në forcat e armatosura deri në fund të vitit 2023 ishte njëzet herë më i lartë se para luftës.

Për më tepër, siç raportohet nga media britanike “The Telegraph”, 20% e ushtarëve rusë mund të jenë HIV pozitivë, sipas llogaritjeve të autoriteteve ukrainase, bazuar në shkallën e infeksionit të ushtarëve të kapur rob.

Ky shpërthim rastesh besohet të jetë për shkak të transfuzioneve të shumta të gjakut të kryera në vijën e frontit, si dhe ripërdorimit të shiringave në spitalet fushore.

Dy mënyra të tjera transmetimi theksohen nga ky raport: marrëdhëniet seksuale të pambrojtura (veçanërisht me prostitutat) dhe ndarja e shiringave gjatë përdorimit të drogës.

Sipas institutit, i cili, i referohet dëshmive të gazetarëve të pavarur, këto dy praktika janë të përhapura në një ushtri të përbërë nga burra që jetojnë çdo ditë sikur të ishte e fundit dhe që fitojnë një jetesë të mirë.

1.1 milion raste të HIV në Rusi: Rusia është veçanërisht e prekur nga epidemia e AIDS-it dhe renditet ndër pesë vendet në botë me shkallët më të larta të infeksionit.

Janë rreth 1.1 milion raste të regjistruara të HIV-it, dhe ndoshta edhe më shumë për shkak të nën-diagnostikimit dhe mbledhjes së të dhënave fragmentare.

Sipas z. Vadim Pokrovski, drejtor i Qendrës Federale Metodologjike Ruse për Parandalimin e HIV/AIDS-it, i cituar nga gazeta britanike “The Times”, 30000 rusë në moshë pune vdesin nga AIDS çdo vit.

Vendi thuhet se ka prevalencën më të lartë (numri i përgjithshëm i njerëzve të prekur nga një sëmundje në një popullsi të caktuar në një kohë të caktuar, shënim i redaktorit) me 240000 njerëz që jetojnë me virusin.

Sipas UNAIDS-it, vendet e tjera me numrin më të lartë të infeksioneve të reja janë Afrika e Jugut, Mozambiku, Nigeria dhe India, ku dy të fundit kanë popullsi shumë më të madhe se Rusia.

Agjencia e OKB-së vlerëson se vetëm Rusia do të përbënte 4% të infeksioneve globale me HIV në vitin 2021, pavarësisht se ka më pak se 2% të popullsisë së botës.

Këto të dhëna janë hedhur poshtë nga Federata Ruse si propagandë.

Ndalimi i edukimit seksual dhe mbyllja me forcë e qendrave shëndetësore.

Instituti Carnegie beson se arsyet që pengojnë rënien e virusit - siç ka ndodhur në shumicën e vendeve që nga vitet 1990 - janë në thelb politike.

Rusia është një nga vendet e fundit të mëdha që ndalon trajtimin zëvendësues, i cili, përfshin zëvendësimin e përdorimit të paligjshëm të opiateve me metadon të kontrolluar.

Për më tepër, edukimi seksual rreth metodave kontraceptive dhe dobia e kontrollit për sëmundjet seksualisht të transmetueshme është ndaluar në shkolla.

Disa organizata bamirësie gjithashtu denoncojnë ligjet diskriminuese që e zvogëlojnë në mënyrë drastike aksesin në parandalim dhe kujdes.

Ligji i agjentëve të huaj, për shembull, ka detyruar disa  grupe parandaluese të HIV-it të zvogëlojnë ose edhe të ndërpresin aktivitetet e tyre vitet e fundit.

Në prill të vitit 2025, Zyra e Prokurorit të Përgjithshëm Rus njoftoi se Fondacioni Elton John AIDS, i cili, ka luftuar  AIDS-in  në të gjithë botën për më shumë se 30 vjet, sapo ishte klasifikuar si i padëshirueshëm.

Degët e tij u detyruan kështu të mbyllnin dyert e tyre.

Enti mediatik “The Times” gjithashtu pretendon, duke cituar mediat ruse në mërgim, se qendrat e kujdesit dhe testimit për HIV-in janë zhdukur praktikisht nga rajonet e Ukrainës të pushtuara nga ushtria ruse, siç është Khersoni.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit