MBRETËRIA E SPANJËS | ALARM PËR XHIHAD ISLAMIK; 95 ARRESTIME NË TETË MUAJ; 8 PREJ TË ARRESTUARVE TË MITUR || MINISTRIA E BRENDSHME: GJITHNJË E MË SHUMË TË RINJ RADIKALIZOHEN NË INTERNET.

Madrid, Mbretëria e Spanjës | Lufta kundër terrorizmit xhihadist në Spanjë po përjeton një përshkallëzim shqetësues.

Në tetë muajt e parë të vitit, 95 veta u arrestuan për lidhje të dyshuara me terrorizmin, ndërsa rastet e radikalizimit të të rinjve shumë të rinj, shpesh në internet, janë gjithnjë e më të shpeshta.

Tetë nga të arrestuarit janë të mitur.

“Shumica e të ndaluarve (84 persona) në afërsisht pesëdhjetë operacione të kryera që nga fillimi i vitit u arrestuan në tokën spanjolle, një e treta në Katalonjë, ndërsa pjesa tjetër u kapën jashtë vendit në bashkëpunim me forcat policore në vende të tjera”, sipas të dhënave të publikuara nga Ministria e Brendshme.

Ky fenomen po monitorohet nga afër nga agjencitë e inteligjencës dhe antiterrorizmit, veçanërisht për shkak të rritjes së ndjeshme të arrestimeve tek të rinjtë, shpesh adoleshentë.

Ekspertët besojnë se ky trend është i lidhur me radikalizimin online, i intensifikuar nga pandemia, me përmbajtje ekstremiste që migron në platformat e mediave sociale më të njohura tek të rinjtë.

Nuk ka një profil të vetëm të të miturve të përfshirë, të cilët, vijnë nga prejardhje shoqërore shumë të ndryshme.

Operacionet, të cilat u zhvilluan në 12 nga 17 komunitetet autonome të Spanjës dhe në qytetin autonom të Melillës, Marok, përfshinë gjithashtu katër gra, përfshirë dy motra të arrestuara në Madrid për drejtimin e një akademie xhihadi online, një platformë për indoktrinimin e grave të tjera myslimane.

Të arrestuarit janë kryesisht shtetas spanjollë dhe marokenë.

Hetimi zbuloi gjithashtu ndikues xhihadistë, të cilët, nën maskën e mësimdhënies së vetëmbrojtjes ose fitnesit, përhapnin mesazhe radikalizimi.

Që nga sulmet xhihadiste në Madrid më 11 mars 2004, në Spanjë janë arrestuar gjithsej 1357 persona të lidhur me terrorizmin islamist.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit