MALTA SHFUQIZOI SKEMËN E SHITJES SË PASAPORTAVE (PASI PËRFITOI MILIARDA NGA SHITJA E TYRE).

Valeta, Maltë | Mirupafshim listës së çmimeve për shitjen e pasaportave.

Pas më shumë se një dekade kritikash, skema kontroverse e pasaportës së artë për shitjen e shtetësisë malteze, e nisur në vitin 2014 nga qeveria e sapozgjedhur laburiste e ambiciozit Zhozef Muskat (Joseph Muscat), do të shfuqizohet zyrtarisht.

Amendamenti i propozuar në Aktin e Shtetësisë së Maltës, numri 188, erdhi nga qeveria malteze e udhëhequr tani nga Robert Abela (i cili pasoi z. Muskat në vitin 2020, e përfshirë në protesta për shkak të zbulimeve rreth vrasjes së gazetares Daphne Caruana Galizia).

Z. Abela e kishte mbrojtur më parë skemën.

Ai u detyrua të largohej nga vendimi i Gjykatës Evropiane të Drejtësisë prillin e kaluar, i cili, e shpalli programin maltez në shkelje të ligjit të BE-së sepse fitimi i shtetësisë së Bashkimit Evropian nuk mund të jetë rezultat i një transaksioni tregtar.

Ditët e fundit, Ministri i Brendshëm Biron Kamileri (Byron Camilleri) paraqiti një propozim për të shfuqizuar skemën dhe për ta zëvendësuar atë me një rishikim të konsiderueshëm, duke pohuar të drejtën e Maltës për të lëshuar pasaportat e saj kujtdo që e konsideron të përshtatshëm.

Gjatë 11 viteve të fundit, skema e vjetër garantonte pasaportën malteze (e cila, hap zonën Shengen dhe ofron udhëtim pa viza në mbi 100 vende, përfshirë ShBA-ës) në këmbim të kontributeve prej të paktën një milion eurosh, nga të cilat, të paktën 600000 € në para të gatshme, pjesa tjetër në blerje pasurish të paluajtshme dhe donacione.

Në një takim informues me gazetarët maltezë të mërkurën, Ministri Kamileri deklaroi se elementi transaksional i procesit do të eliminohet plotësisht nga programi, ashtu si edhe roli i luajtur nga agjentët, strukturat e krijuara për të trajtuar të gjithë procedurën për mbi një mijë individë të pasur nga e gjithë bota (rusë, azerbajxhanë, libianë, arabë dhe kinezë, kombësitë e klientëve kryesorë të programit që ka sjellë miliarda euro në arkën e Valettës).

“Marrja e shtetësisë - argumentoi ai - tani do të jetë e hapur për ata që kanë ofruar shërbime dhe kontribute të jashtëzakonshme në Maltë.

Ne do ta respektojmë vendimin e BE-së dhe do t'i përmbahemi vendimit të saj”, deklaroi ministri.

Megjithatë, Gjykata ka konfirmuar gjithashtu se dhënia e shtetësisë është një kompetencë kombëtare.

“Ne do ta zgjerojmë dhe forcojmë mënyrën se si jepet shtetësia në bazë të meritës”, tha ai, duke kujtuar se Malta ka pasur një program shtetësie të bazuar në meritë që nga viti 2017, kur u prezantua me mbështetje dypartiake në një përpjekje (të kotë) për të ndaluar procesin, i cili, përfundimisht u refuzua tre muaj më parë.

Tani, Akti i Shtetësisë do të ndryshohet për të lejuar gjithashtu filantropët dhe teknologët të përfitojnë nga programi i shtetësisë i bazuar në meritë.

Midis tyre, krijimi i vendeve të punës përmendet në mënyrë të qartë si një kriter për vlerësimin e një kontributi të jashtëzakonshëm në vend.

Sidoqoftë, ministri do të jetë gjithashtu në gjendje të emërojë individë natyralizimi i të cilëve është me interes të jashtëzakonshëm për Republikën e Maltës, duke dhënë shembullin hipotetik të një kirurgu të huaj që ofron një shërbim mjekësor që aktualisht nuk është i disponueshëm në Maltë.

Për opozitën, ridizajnimi është një fitore.

“Shtetësia malteze nuk duhej të ishte nxjerrë kurrë në shitje”, deklaroi Partia Nacionaliste, duke thënë se mirëpret" heqjen e programit.

Vendimi i Gjykatës Evropiane të Drejtësisë ka hedhur një hije mbi vendin tonë, por është pozitive që Partia Laburiste ka pranuar se shtetësia nuk mund të shitet, edhe nëse e ka bërë këtë vetëm pas një vendimi nga Gjykata Evropiane.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit