KUBË | MINISTRI I JASHTËM BRUNO RODRIGUEZ: DËNOJMË VENDBANIMET E REJA TË IZRAELIT NË LINDJEN E MESME.

Havanë, Kubë | Kuba dënoi politikat e Izraelit në lidhje me promovimin e vendbanimeve të paligjshme në territoret e pushtuara palestineze.

Në një mesazh të botuar në rrjetin shoqëror Iks (X), ministri i Jashtëm i ishullit, Bruno Rodriguez, shënjestroi konkretisht planin “E1” dhe dhunën nga kolonët në Bregun Perëndimor dhe Jeruzalemin Lindor.

Ministri i jashtëm Rodriguez paralajmëroi se ngjarjet kompromentojnë vazhdimësinë gjeografike të zonës dhe kërcënojnë qëndrueshmërinë e një shteti të pavarur palestinez, brenda kufijve të qershorit 1967, me Jeruzalemin Lindor si kryeqytetin e tij.

Ministri Rodriguez i quajti politikat e Izraelit shkelje të re dhe flagrante të rezolutave përkatëse të OKB-së.

“Një zgjidhje për çështjen palestineze, përfaqëson një kusht të domosdoshëm për arritjen e një paqeje të drejtë dhe të qëndrueshme në Lindjen e Mesme, përballë tensioneve në rritje që kërcënojnë sigurinë ndërkombëtare”, - tha ai.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit