ARGJENTINË | QEVERIA E PRESIDENTIT JAVIER MILEI DEKLASIFIKOI DOSJET E INTELIGJENCËS MBI DIKTATURËN; 492 FAQE NË INTERNET.

Buenos Aires, Argjentinë | Autoritetet argjentinase kanë botuar 492 faqe dokumentesh të Inteligjencës që mbulojnë periudhën nga viti 1973 deri në vitin 1983, duke përfshirë vitet e diktaturës ushtarake, duke deklasifikuar për herë të parë një pjesë të arkivave.

“Dosjet, janë të disponueshme në faqen e internetit të qeverisë dhe përfshijnë një larmi të gjerë materialesh, nga lista të thjeshta administrative deri te raportet e mbikëqyrjes mbi universitetet, sindikatat, bizneset dhe organizatat politike”, raportoi enti mediatik vendor “Clarín”.

Dokumentet përfshijnë udhëzime për zhvillimin e aktiviteteve të inteligjencës strategjike psiko-sociologjike, me udhëzime për monitorimin e medias dhe analizimin e përmbajtjes, orientimeve ideologjike dhe mesazheve të tyre.

Dokumente të tjera përmbajnë udhëzime operative, duke përfshirë mënyrën e adresimit të shkurtimeve të buxhetit, siç është ulja e konsumit të energjisë në objekte.

Iniciativa, sipas Sekretariatit të Inteligjencës, përfaqëson një akt etik, politik dhe shoqëror që synon forcimin e transparencës dhe besimit publik, në një kontekst të shënuar nga dezinformimi në lidhje me të kaluarën e afërt.

Dokumentet do të transferohen gjithashtu në Arkivin e Përgjithshëm të Kombit për të siguruar aksesin publik dhe për të promovuar studimet historike.

Botimi, vjen një javë para pesëdhjetëvjetorit të grushtit të shtetit të vitit 1976 që nisi diktaturën, gjatë të cilit, sipas organizatave të të drejtave të njeriut, afërsisht 30 mijë njerëz u vranë ose u zhdukën.

Nga z. Erton Duka.

© Copyright | Agjencia Telegrafike Vox

Ne të njohim me botën | Burimi yt i informacionit