AEROPLANËT “AIRBUS A320” NUK DO TË NGRIHEN NË FLUTURIM | KONSIDEROHEN TË KOMPROMENTUAR NGA RREZATIMI DIELLOR.

Hagë, Mbretëria e Holandës | “Rrezatimi intensiv diellor ka lënë në tokë mijëra avionë Airbus A320 për mirëmbajtje emergjente”.

Kështu njoftoi shoqëria.

“Airbus ka identifikuar një numër të konsiderueshëm avionësh të Familjes A320 që janë aktualisht në shërbim dhe që mund të preken”, thuhet në deklaratë.

Vlerësohet se afërsisht 6 mijë avionë janë prekur.

“Airbus ka bashkëpunuar në mënyrë proaktive me autoritetet e aviacionit për të kërkuar veprime të menjëhershme parandaluese nga operatorët nëpërmjet një transmetimi Alarm për Operatorin (AOT) për të zbatuar mbrojtjet e disponueshme të softuerit dhe/ose harduerit dhe për të siguruar sigurinë e flotës”, tha kompania.

Zbulimi i efekteve të stuhive diellore në kontrollet e fluturimit është rezultat i një hetimi mbi problemet e hasura në një fluturim të JetBlue nga Kankun (Cancun), Meksikë, në Njuark (Newark), të Xhersit të Ri (New Jersey), më 30 tetor.

Aeroplani pësoi një humbje të papritur të lartësisë, duke i detyruar pilotët të bënin një ulje emergjente në Tampa, Florida.

Pesëmbëdhjetë pasagjerë u plagosën dhe u dërguan në spital.

Puna e mirëmbajtjes emergjente, e cila, do të fillojë këtë fundjavë, pritet të ndikojë vetëm në softuerin e A320 dhe nuk do të zgjasë më shumë se disa orë.

Megjithatë, për modelet më të vjetra, ndërhyrja e kërkuar mund të jetë më e gjatë dhe të rezultojë në ndërprerje të zgjatura të fluturimeve për udhëtarët.

“Airbus e njeh që këto rekomandime do të shkaktojnë ndërprerje operative për pasagjerët dhe klientët. Kërkojmë ndjesë për shqetësimin e shkaktuar dhe do të bashkëpunojmë ngushtë me operatorët, duke e ruajtur sigurinë si përparësinë tonë kryesore”, thuhet në deklaratën e shoqërisë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit