UDHËHEQËSI I KISHËS UKRAINASE SVIATOSLAV SHEVÇUK (SHEVCHUK): JAM I LODHUR NGA LUFTA POR JO I MUNDUR; DUHET NDALUR KORRUPSIONI NË RADHËT E PUSHTETARËVE DHE TË SHOQËRISË.

Kiev, Ukrainë | Kreu i Kishës Katolike Greke të Ukrainës, Sviatoslav Shevçuk (Shevchuk), i nxit besimtarët e tij të qëndrojnë të bashkuar, të zhdukin korrupsionin dhe të arrijnë së bashku fitoren e vërtetë.

“Ukraina - shkruan Kryepeshkopi - në letrën e tij baritore të Adventit, është në grahmat e luftës. Është një luftë ekzistenciale, sepse ka të bëjë me zgjedhjen e Ukrainës: të jetë e lirë, të jetojë në të vërtetën, të ndërtojë jetën mbi vlera që i përgjigjen vullnetit të Zotit.

Është një përplasje qytetërimesh, sepse bota është e ndarë midis atyre që aspirojnë lirinë dhe atyre që zgjedhin errësirën dhe dhunën.

Në vitin e dymbëdhjetë të luftës dhe vitin e katërt të transformimit të saj të plotë, ndihemi të lodhur, por jo të mundur”.

Për Kryepeshkopin e Madh të Kievit, fitorja e vërtetë për Ukrainën nuk do të vijë nga ndërhyrja e aleatëve apo përpjekjet diplomatike.

“Do të vijë kur secili prej nesh të ofrojë sakrificën tonë më të mirë të mundshme; kohën, forcën, aftësinë, rehatinë dhe, nëse është e nevojshme, jetën.

Vetëm përmes kufizimit personal do të krijojmë një burim të përbashkët të aftë të bëhet një forcë e pamposhtur.

Garancia e fitores sonë duhet të jetë pastrimi i shoqërisë nga korrupsioni, nga apatia, nga inercia e modeleve sovjetike të shtetit, ushtrisë dhe menaxhimit ekonomik.

Puna e organeve antikorrupsion duhet të plotësohet nga qëndrimi i pakompromis i të gjithëve ndaj të gjitha formave të korrupsionit dhe përvetësimit të pronës publike”, tha Kryepeshkopi.

“Fitorja e Ukrainës nuk është vetëm një objektiv politik ose ushtarak.

Fitorja shpirtërore e dritës mbi errësirën, e së vërtetës mbi gënjeshtrat, e dashurisë mbi urrejtjen, varet prej saj.

Dhe kjo do të jetë e mundur vetëm nëse jemi të gatshëm t'i bashkohemi asaj me sakrificën tonë.

Do të bëhet realitet nëse ruajmë unitetin e popullit si një kusht të domosdoshëm për arritjen e qëllimit”, tha ai.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit