TUNIZI | TENSIONE TË FORTA DIPLOMATIKE MES TUNISIT DHE BASHKIMIT EVROPIAN; PRESIDENTI KAIS SAIED THIRRI AMBASADORIN E BASHKIMIT EVROPIAN NË TUNIS XHUZEPE (GIUSEPPE) PERRONE NË PALLATIN E KARTAGJENËS.

Tunis, Tunizi | “Presidenti tunizian Kais Saied thirri Ambasadorin e Bashkimit Evropian në Tunis, Xhuzepe (Giuseppe) Perrone, në Pallatin e Kartagjenës për të shprehur protestën e tij të fortë kundër mosrespektimit të rregullave diplomatike dhe trajtimit të marrëdhënieve diplomatike jashtë kanaleve zyrtare të njohura në cilësinë e tij si Ambasador i Bashkimit Evropian në shtetin tunizian dhe institucionet e tij”.

Kjo është ajo që thuhet në një shënim nga presidenca tuniziane.

Sipas komentuesve vendas, referenca është për takimin e së hënës së kaluar midis Ambasadorit Perrone dhe z. Nuredin Tabubi (Noureddine Taboubi), sekretarit të përgjithshëm të sindikatës së fuqishme UGTT.

Gjatë takimit, ambasadori i Bashkimit Evropian vlerësoi rolin e UGTT-së, duke përmendur Çmimin Nobel për Paqen për vitin 2015 të dhënë Kuartetit për Dialog Kombëtar, dhe riafirmoi angazhimin e Evropës për të ruajtur bashkëpunimin me shoqërinë civile tuniziane.

Ditët e fundit, UGTT-ja kishte paralajmëruar për mundësinë e një greve kombëtare në mbrojtje të të drejtave sindikale, në sfondin e një krize ekonomike dhe sociale që vazhdon të nxisë protesta dhe mobilizime.

Takimi i ambasadorit të Bashkimin Evropian me sindikatën ishte pjesë e një serie takimesh me palë të tjera të interesuara tuniziane, përfshirë një me shoqatën e punëdhënësve të Utica-s, i cili, u zhvillua disa ditë më parë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit