STAMBOLL | TË SHTËNA ME ARMË ZJARRI PRANË KONSULLATËS IZRAELITE; NJË SULMUES U VRA; DY U ARRESTUAN.

Stamboll, Turqi (Türkiye) | Ata po shkonin drejt konsullatës izraelite në Stamboll dhe kur policia i urdhëroi të ndalonin, ata i drejtuan armët nga oficerët që patrullonin zonën.

Në një shkëmbim zjarri dhjetëminutësh jashtë misionit diplomatik, njëri nga sulmuesit u vra, ndërsa dy të tjerët u plagosën dhe janë në paraburgim.

Dy nga oficerët e përfshirë në përpjekjen për të ndaluar sulmin pësuan gjithashtu lëndime të lehta.

Shumë detaje mbeten të paqarta dhe është hapur një hetim, megjithatë askush nuk e ka marrë përgjegjësinë.

“Një nga individët - i identifikuar si Junus (Yunus) ES - u zbulua se kishte lidhje me një organizatë që shfrytëzon fenë”.

Kështu tha Ministri i Brendshëm turk Mustafa Ciftci, një deklaratë që shumë gazetarë turq e interpretuan si një referencë për ISIS-in, një organizatë që ka kryer sulme të shumta në Turqi në të kaluarën.

Brenda pak orësh nga sulmi, 17 të dyshuar që besohet se janë të lidhur me të ashtuquajturin Shtet Islamik u arrestuan në Stamboll.

Dy sulmuesit e tjerë, të identifikuar si Onur Ç. dhe Enes Ç., janë vëllezër, dhe njëri prej tyre kishte një histori trafiku droge.

Për të arritur në metropolin turk, të tre ishin nisur me një makinë me qira nga Izmiti, një qytet rreth 100 kilometra në lindje të Stambollit, dhe filluan sulmin pak pas mesditës.

Ndërsa hetimi vazhdon, Turqia ka njoftuar gjithashtu arrestimin e dy personave të tjerë të lidhur me sulmuesit.

Konsullata izraelite ndodhet në një kompleks rrokaqiejsh në zemër financiare të qytetit në Bosfor, në lagjen Levent.

Ky kompleks gjithashtu strehon zyrat e bankës turke Yapi Kredi dhe është afër qendrave tregtare të ngarkuara dhe ambienteve të tjera bankare.

Misioni diplomatik izraelit në Stamboll ishte plotësisht bosh në kohën e sulmit dhe ka qenë i mbyllur për rreth dy vjet e gjysmë, pasi Izraeli tërhoqi stafin e tij për arsye sigurie.

“Terrorizmi nuk do të na dekurajojë”, komentoi Ministria e Jashtme izraelite, e cila, shprehu gjithashtu vlerësim për veprimin në kohë të forcave turke të sigurisë në pengimin e këtij sulmi.

Që nga 7 tetori 2023, marrëdhëniet midis Ankarasë dhe shtetit hebre janë përkeqësuar ndjeshëm për shkak të qëndrimeve të ndryshme mbi konfliktin e Gazës.

“Ne do të vazhdojmë luftën tonë kundër të gjitha formave të terrorizmit dhe nuk do të lejojmë që provokimet e vogla dhe të synuara të minojnë klimën e sigurisë në Turqi”, tha Presidenti Rexhep Tajip Erdogan, duke dënuar sulmin e egër pranë misionit diplomatik izraelit.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit