SA AZIL KËRKUES KA NË MBRTËRINË E BASHKUAR?

Planet e reja të qeverisë për të strehuar emigrantët në ish-bazat ushtarake kanë çuar në kundërshtimet e konservatorëve që kërcënojnë veprime ligjore për të bllokuar skemën. Mijëra azilkërkues do të mbahen në disa vende në të gjithë vendin, u tha dje deputetëve ministri i imigracionit Robert Jenrick. Ka gjithashtu plane për të mbajtur emigrantët në maune dhe tragete, ndërsa Home Office përpiqet të reduktojë numrin e azilkërkuesve që jetojnë në hotele. Çfarë ka njoftuar Qeveria? Sipas planit të qeverisë, azilkërkuesit do të çoheshin në bazat ushtarake në RAF Scampton në Lincolnshire, në MDP Wethersfield në Essex dhe një vend në Bexhill, East Sussex, që dikur ishte burgu Northeye. Këshilli i Qarkut West Lindsey dhe Këshilli Braintree po përgatiten për një betejë ligjore me qeverinë për të bllokuar përdorimin e Scampton dhe Wethersfield si vend strehime emigrantësh. Kryeministri Rishi Sunak, gjithashtu ka paraqitur propozime për strehimin e migrantëve në Catterick Garrison në North Yorkshire, i cili, është në zonën e tij zgjedhore, sipas z. Jenrick. Pas njoftimeve për disa gazeta se qeveria ishte e gatshme t'i vendoste azilkërkuesit në maune lundruese ose anije lundrimi, Jenrick mundi të thoshte vetëm se ministrat po "eksploronin mundësinë e akomodimit të emigrantëve në anije si në Skoci dhe në Holandë". Një port tregtar në Dorset, Portland Port, tha se ishte kontaktuar nga Zyra e Brendshme për sigurimin e hapësirës për një strukturë akomodimi. Sa migrantë do të strehoheshin në lokacione? Z. Jenrick tha se "disa mijëra" azilkërkues do të mbahen në vendndodhje pasi kërkon të shkurtojë shumën që po paguan për të strehuar emigrantët në hotele. Wethersfield dhe Scampton do të synojnë të mbajnë rreth 3700 azilkërkues dhe 1200 në Bexhill. Sipas raporteve, aktualisht janë rreth 51000 emigrantë që qëndrojnë në rreth 400 hotele. Qeveria ka thënë më parë se shpenzon 6.8 milionë funte në ditë për strehimin e emigrantëve në hotele, me kërkesë shtesë të krijuar nga mijëra njerëz që mbërrijnë nëpërmjet Kanalit në Mbretërinë e Bashkuar. Në mars, mbikëqyrësi i ndihmës së huaj, Komisioni i Pavarur për Ndikimin e Ndihmës, kritikoi 3.5 miliardë paund të shpenzuara nga qeveria për kostot e akomodimit të azilit vitin e kaluar. Kjo kosto është trefishuar brenda një viti. Sa azilkërkues ka në MB? Sipas të dhënave të Zyrës së Brendshme, numri i njerëzve në Mbretërinë e Bashkuar që presin një vendim për azil arriti në 166300 gjer në fund të dhjetorit 2022. Ka një grumbull prej rreth 110000 njerëzish që kanë pritur për gjashtë muaj ose më shumë për një vendim mbi kërkesën e tyre, nga 18734 deri në fund të marsit 2019. Aplikantëve nga Afganistani, Eritrea, Libia, Siria dhe Jemeni u janë pranuar 95 për qind të kërkesave të tyre për azil. Shifrat e Home Office treguan gjithashtu se më shumë se tre të katërtat e aplikantëve patën sukses në kërkesat e tyre për azil në vitin 2022, më i larti në më shumë se 30 vjet. Shifrat që presin një vendim për më shumë se gjashtë muaj janë rritur me më shumë se 13 herë që nga viti 2016. Vitin e kaluar, pati 74800 kërkesa të reja për azil në lidhje me 89000 njerëz, numri më i lartë vjetor që nga viti 2002. Pak më pak se gjysma (45 përqind) e kërkesave totale për azil në MB vitin e kaluar ishin nga njerëz që mbërritën me një varkë të vogël. Cilat janë shifrat në vendkalimet me varka të vogla? Vitin e kaluar pati një rekord 45728 migrantësh që kaluan Kanalin Anglez me varka të vogla, një kërcim prej më shumë se 60 për qind në krahasim me shifrën e vitit 2021, kur 28526 kryen atë lloj udhëtimi. Numri është rritur në mënyrë të qëndrueshme çdo vit që kur 299 persona u zbuluan duke bërë udhëtimin në vitin 2018. Kishte 1843 njerëz që kaluan në 2019, 8466 njerëz që kaluan në 2020 dhe 28526 njerëz që kaluan në 2021, sipas Zyrës së Brendshme. Nga janë azilkërkuesit? Nga 45755 mbërritjet me varka të vogla në vitin 2022, 43794 prej tyre i'u regjistrua kombësia dhe nga ky total 28 për qind ishin shtetas shqiptarë, 20 për qind afganë, 13 për qind iranianë dhe 10 për qind irakianë. Shqipëria ishte kombësia më e zakonshme që aplikonte për azil në Britaninë e Madhe në vitin 2022, me 14223 aplikime nga shtetas shqiptarë, 9573 prej të cilave erdhën nga mbërritjet me anije që kalonin Kanalin Anglez. Shumica e aplikantëve shqiptarë në vitin 2022 (83 për qind) ishin meshkuj të rritur. Mbërritjet shqiptare arritën kulmin gjatë korrikut deri në shtator 2022, kur ata përbënin gati gjysmën (45 për qind) të të gjitha kalimeve të zbuluara. Afganët ishin kombësia e dytë më e zakonshme që aplikonin për azil vitin e kaluar, me 10011 aplikime, më shumë se gjashtëfishi i numrit në vitin para pandemisë 2019 (1573). Në vitin 2021, shqiptarët përbënin vetëm 3 për qind të mbërritjeve me varka të vogla, kombësia e të cilëve u regjistrua, ndërsa shtetasit afganë përbënin 5 për qind, iranianët 30 për qind dhe irakenët 22 për qind.