MOSHA BIOLOGJIKE E ORGANEVE E LLOGARITUR ME NJË ANALIZË GJAKU TREGON RREZIKUN E SËMUNDJEVE QË MUND TË HASEN BRENDA 10 VITEVE.

Londër, Mbretëria e Bashkuar | Pas selfie-t të aftë për të zbuluar moshën biologjike të një personi me ndihmën e Inteligjencës Artificiale, një test gjaku tani na lejon të analizojmë nënshkrimin e lënë nga proteinat dhe kështu të gjurmojmë moshën biologjike të 11 organeve, duke përfshirë trurin, zemrën dhe mëlçinë, dhe prej andej të parashikojmë rrezikun e sëmundjeve në 10 vitet e ardhshme.

Ky është rezultati i një studimi nga Stanford Medicine i ShBA-ës, i botuar në revistën “Nature Medicine”, i cili, ofron mënyra të reja për të kuptuar efektivitetin e terapive që synojnë ngadalësimin e plakjes dhe hap mundësinë e ndërhyrjes përpara se të shfaqen sëmundjet.

Studiuesit e udhëhequr nga z. Toni Uis Korei (Tony Wyss-Coray) përzgjodhën rastësisht gati 45000 njerëz të moshës midis 40 dhe 70 vjeç, të dhënat e të cilëve ruhen në Biobankën e madhe të Mbretërisë së Bashkuar, dhe i monitoruan ata për 17 vjet.

Më pas ata analizuan afërsisht 3000 proteina në gjakun e secilit person, disa prej të cilave mund të gjurmohen deri në organe individuale.

Së fundmi, të dhënat u përpunuan nga një algoritëm që vlerësoi nënshkrimin e proteinave të secilit individ dhe llogariti moshën biologjike të organeve të tyre.

Një e treta e pjesëmarrësve kishin të paktën një organ, mosha e të cilit ndryshonte ndjeshëm nga mosha e tyre kronologjike, dhe organet më të vjetra ishin të lidhura fort me rrezikun e zhvillimit të çrregullimeve të ngjashme.

Truri, në veçanti, është treguar të jetë kujdestari i jetëgjatësisë: njerëzit me një tru biologjikisht të vjetër kanë 12 herë më shumë gjasa të diagnostikohen me Alzheimer brenda 10 viteve sesa një person i së njëjtës moshë me një tru më të ri.

Mosha e trurit është gjithashtu parashikuesi më i mirë i rrezikut të përgjithshëm të vdekshmërisë.

Të kesh një tru shumë të vjetër rrit rrezikun e vdekjes me 182% gjatë 15 viteve të ardhshme, ndërsa një tru i ri e zvogëlon atë me 40%.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit