DEPUTETJA BRAZILIANE ME ORIGJINË ITALIANE KARLA (CARLA) ZAMBELLI U ARRESTUA NË ROMË; INTERPOLI E KISHTE SHPALLUR NË KËRKIM POLICOR; E DËNUAR ME 10 VJET BURG; ANËTARE E PARTISË SË ISH-PRESIDENTIT.

Romë, Itali | Znj. Karla (Carla) Zambelli, kongresmenja braziliane me origjinë italiane, e kërkuar nga Interpoli për një dënim me dhjetë vjet burg në Brazil, është arrestuar në Romë.

Znj. Zambelli, anëtare e partisë së ish-Presidentit Jair Bolsonaro, mban shtetësi italiane dhe u dënua në Brazil për hakimin e sistemit kompjuterik të Këshillit Kombëtar të Drejtësisë (CNJ).

Kongresmenja u largua nga Brazili më 25 maj, duke kaluar kufirin me Argjentinën në Foz do Iguaçu me bashkëshortin e saj dhe, pas një ndalese të shkurtër në Shtetet e Bashkuara, njoftoi mbërritjen e saj në Itali.

Fillimisht, me qëllim që të kandidonte për poste të zgjedhura në Itali, znj. Zambelli, sipas deklaratës së avokatit të saj për entin mediatik “CNN”, më vonë e braktisi këtë plan.

Kërkesa pasuese për ekstradim, e nënshkruar më 11 qershor nga gjyqtari i Gjykatës së Lartë braziliane Alexandre de Moraes, iu përcoll Ministrisë italiane të Drejtësisë nëpërmjet Ambasadës braziliane në Romë.

Dy javë më parë, Ministri i Brendshëm Matteo Piantedosi, gjatë kohës së pyetjeve në Dhomën e Deputetëve, theksoi se kishin filluar aktivitete hetimore që synonin gjetjen e saj, në bashkëpunim me autoritetet gjyqësore në Romë, të cilat, u informuan menjëherë për çështjen.

Gjatë hetimeve, raportet për praninë e ish-parlamentares në vende ose kontekste të caktuara u verifikuan menjëherë, gjithmonë me rezultate negative.

Ministri Piantedosi përsëriti gjithashtu se në kohën e kontrollit kufitar në Fiumiçino më 5 qershor, znj. Zambelli nuk kishte të dhëna policore në territorin kombëtar dhe asnjë provë të pafavorshme të gjetur në dokumente dhe për këtë arsye autoritetet policore nuk mund të kishin vazhduar me arrestimin në asnjë mënyrë.

Përpara arrestimit të tij, deputeti italian Anxhelo (Angelo) Bonelli postoi në rrjetet sociale virtuale se i kishte dhënë adresën e znj. Zambelli policisë.

“Zambelli është në një apartament në Romë. Unë ia dhashë adresën policisë”, shkroi ai.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit