ÇFARË ËSHTË ALEANCA BËRTHAMORE E BASHKIMIT EVROPIAN DHE CILAT JANË OBJEKTIVAT E SAJ?

Paris, Francë | Iniciativa, e udhëhequr nga Franca, lindi në vitin 2023 për të promovuar interesat e vendeve pro-atomike.

Hyrja në të e Italisë shënon një hap të rëndësishëm politik dhe strategjik në një kohë kur energjia bërthamore është përsëri në qendër të debatit mbi sigurinë dhe tranzicionin energjetik të Kontinentit të Vjetër.

Italia, deri më tani kishte marrë pjesë si vëzhguese, por, tani, i është bashkuar zyrtarisht Aleancës Bërthamore të BE-së.

Çfarë është Aleanca Bërthamore?

Aleanca Bërthamore u krijua me iniciativën e Francës në shkurt të vitit 2023, me qëllim forcimin e rolit të energjisë bërthamore në tranzicionin evropian të energjisë.

Vendet themeluese fillimisht ishin 12:

Bullgaria, Kroacia, Republika Çeke, Finlanda, Franca, Hungaria, Holanda, Polonia, Rumania, Sllovakia, Sllovenia, Suedia dhe Italia.

Në shkurt të vitit 2025, Belgjika iu bashkua atyre, duke kaluar nga vëzhgues në anëtar të plotë.

Me hyrjen e Italisë, numri i anëtarëve të plotë rritet në 14, ndërsa vetëm Estonia mbetet me statusin e vëzhguesit.

Objektivat e Aleancës Aleanca Bërthamore synon të:

1- Promovojë energjinë bërthamore si një shtyllë të tranzicionit evropian të energjisë, së bashku me burimet e rinovueshme.

2- Të promovojë aksesin në fonde publike dhe private, duke përfshirë zhvillimin e reaktorëve të gjeneratës së re (SMR dhe AMR).

3- Të sigurojë neutralitetin teknologjik, duke përfshirë atë bërthamor midis burimeve të sigurta dhe elastike për të diversifikuar furnizimet me energji.

4- Të zvogëlojë varësitë strategjike, duke zhvilluar një industri autonome bërthamore evropiane në furnizimin me lëndë të para për aplikime energjitike dhe jo-energjetike.

Një qeverisje ende në proces përcaktimi Aleanca aktualisht takohet në margjinat e Këshillave të Energjisë të BE-së, me pjesëmarrjen e ministrave dhe përfaqësuesve të nivelit të lartë të vendeve anëtare.

Qeverisja dhe programi përfundimtar i punës janë ende duke u përcaktuar; në diskutim është një propozim i paraqitur nga Suedia për të strukturuar më tej punën e këtij organi.

Çfarë ndryshon për Italinë?

Duke u anëtarësuar si anëtare e plotë, Italia mund të:

1- Marrë pjesë aktive në të gjitha diskutimet, grupet e punës dhe komunikimet zyrtare me Komisionin Evropian.

2- Kontribuojë në Grupin e Punës për Financimin, i cili, synon të lehtësojë aksesin në fondet e BE-së për projektet bërthamore.

3- Konsolidojë dialogun me Brukselin mbi të gjitha çështjet bërthamore.

4- Forcojë marrëdhëniet me vendet e tjera në favor të zhvillimit të energjisë bërthamore në Evropë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit