XHOVANI (GIOVANNI) BATTISTA RE - DEKAN I KOLEGJIT TË KARDINALËVE - DO TË JETË AI QË DO TË DREJTOJË CEREMONINË MORTORE TË PAPA FRANÇESKUT.

Vatikan | Ironik, besnik dhe element bashkues me xhematet.

I lindur në fshatin e vogël Borno në Val Kamonika (Camonica), kardinali Xhovani (Giovanni) Battista Re – dekan i kolegjit të kardinalëve – do të jetë njeriu më i shquar në ditët në vijim, me momentin më të ngarkuar me drejtimin e funeralit të Papa Françeskut, të planifikuar për të shtunën, më 26 prill.

Ai, i cili, mbushi nëntëdhjetë e një vjeç 30 janarin e kaluar, vjen nga një familje fshatare. Babai i tij ishte marangoz; nëna shtëpiake.

Ai ka një vëlla dhe pesë motra, njëra prej të cilave është një murgeshë Kanosian (Canossian).

Pasi hyri në seminarin e Breshias në moshën njëmbëdhjetë vjeç, në vitin 1945, menjëherë pas Luftës së Dytë Botërore, kreu studimet e mesme dhe ndoqi kurse filozofie dhe teologjie.

Ai u shugurua meshtar nga peshkopi i Breshias, Imzot Xhaçinto Trediçi (Giacinto Tredici), më 3 mars të vitit 1957.

Për vite me radhë ai ishte përfaqësues i Selisë së Shenjtë jashtë vendit, fillimisht në Panama dhe më pas në Iran, përpara se të kthehej në Vatikan në Sekretariatin e Shtetit, ku qëndroi për 28 vjet.

Më 9 tetor 1987 u gradua sekretar i Kongregatës për Ipeshkvij dhe mori shugurimin peshkopal nga duart e Gjon Palit II, në Bazilikën e Vatikanit, më 7 nëntor të po këtij viti, si kryepeshkop titullar i Veskovios.

Në të njëjtën kohë ai ishte edhe sekretar i kolegjit të kardinalëve.

Bashkëpunimi i tij me Papa Vojtilën (Wojtyla) ishte i vazhdueshëm. Si zëvendës i Sekretariatit të Shtetit, ai shoqëroi Papën në udhëtime të shumta apostolike në Itali dhe jashtë saj.

Si peshkop ai zgjodhi moton “Virtus ex alto”.

I emëruar kardinal në vitin 2001 nga Papa Gjon Pali II, ai mori pjesë në konklavën e prillit të vitit 2005 që zgjodhi Benediktin XVI dhe në atë të marsit të vitit 2013 që zgjodhi Papa Françeskun.

Më 18 janar të vitit 2020 Papa Bergolio miratoi zgjedhjen e bërë nga kardinalët e Urdhrit të Peshkopëve, si dekan i Kolegjit të Kardinalëve.

Një rol që iu shtri nga vetë Papa Bergolio, për të cilin, kishte respektin maksimal.

Ai ka pasur gjithmonë një marrëdhënie të shkëlqyer harmonie dhe besnikërie me Papa Françeskun. Një person i besueshëm dhe një njeri politik, me njohuri të mprehta për diplomacinë, ka qenë gjithmonë i sjellshëm edhe me gazetarët, megjithëse ishte kursyer me lajmet.

Ai do të jetë ai që do të drejtojë funeralin e Papa Françeskut të shtunën, duke u kujdesur edhe për ftesat e krerëve të shteteve dhe për ceremoninë ku do të përqendrohen sytë e gjithë botës.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit