SULMUESI I LIVERPULIT DHE KOMBËTARES SË PORTUGALISË DIOGO JOTA DHE VËLLAI I TIJ MË I VOGËL ANDRÉ JOTA MBETËN TË VDEKUR NË NJË AKSIDENT AUTOMOBILISTIK SI PASOJË E SHPEJTËSISË TEJET TË LARTË.

Zamorë, Mbretëria e Spanjës | Pjesë të kangjellave mbrojtëse të shqyera njëqind metra larg dhe një karkasë e përmbysur e një automjeti “Lamborghini Huracan”, e katandisur në një masë të zezë pa formë.

Kjo është ajo që ka mbetur në kilometrin e 65-të të autostradës A-52 pranë Zamorës, në Spanjën veriore, në vendin e aksidentit që i kushtoi jetën sulmuesit të kombëtares së Liverpoolit dhe Portugalisë, Diogo Jota, me moshë 28 vjeç, dhe vëllait të tij më të vogël, André, me moshë 26 vjeç, një futbollist i Penafield, i cili, po kalonte pushimet në Spanjë me të.

“Pak pas mesnatës, makina me të cilën udhëtonin humbi kontrollin për shkak të shpërthimit të një gome të pasme gjatë një parakalimi.

Ajo doli nga rruga dhe u përfshi nga flakët, duke përfshirë bimësinë përreth”, sipas rindërtimit të Gardës Civile.

Garda Civile, raporton se si shkak i aksidentit, ishte një tejkalim i mundshëm i shpejtësisë së makinës, krahasuar me shpejtësinë e lejuar prej 120 km/orë.

Nuk kishte asgjë që mund të bëhej për dy vëllezërit. Vdekjet u konfirmuan në vend nga zjarrfikësit dhe ekipet e shpëtimit.

Megjithatë, për shkak të dëmeve të shkaktuara në trupa nga flakët, viktimat u transferuan në Institutin Anatomo-Forenzik për identifikim të ADN-së.

Gjithçka u shkatërrua brenda pak sekondash.

Për Diogon, ëndrra e martesës u bë realitet vetëm 12 ditë më parë me të dashurën e tij prej shumë kohësh, Rute Kardoso (Cardoso), në një ceremoni në Porto të Portugalisë, e ndarë prej tyre në rrjetet sociale virtuale, me pamje që i portretizojnë ata plot shkëlqim.

Sulmuesi i Reds-ave la pas gruan dhe tre fëmijët e tyre, Denisin, 4 vjeç, Duarten, 2 vjeç, dhe më të voglin e lindur disa muaj më parë, në muajin nëntor.

Ai kishte filluar stërvitjen me Liverpoolin për sezonin e ardhshëm, pasi javën e fundit të pushimeve e kaloi edhe me vëllanë e tij André Teixeira da Silva, një futbollist në klubin portugez të divizionit të dytë, me të cilin, ishte shumë i afërt, me të cilin, ishte rritur si futbollist në vendin e tij të lindjes, duke luajtur me Gondomar-in, përpara se të transferohej, shumë i ri në vitin 2016, te Atletico Madrid.

Një tragjedi që tronditi të gjithë botën e sportit.

“Sot futbolli portugez është absolutisht i shkatërruar. Jemi të gjithë në zi”, tha presidenti i Federatës Portugeze të Futbollit, Pedro Proença.

Diogo Jota ishte një talent i gjeneratës së tij: një sulmues i gjithanshëm, i aftë të luante si sulmues i krahut të majtë dhe si sulmues, ai u dallua për shpejtësinë, qëndrueshmërinë dhe teknikën e tij të jashtëzakonshme individuale.

Pas një periudhe të shkurtër te Atlético dhe një huazimi te Porto, ai filloi aventurën e tij në Premier League me Wolverhampton në vitin 2017, duke u bërë menjëherë një nga lojtarët kryesorë në promovimin e Wolves-ave në Premier League.

Në vitin 2019, tregolëshi i tij kundër Leicester-it e bëri atë portugezin e parë që shënonte tre gola në një ndeshje të Premier League-ës që nga Kristiano (Cristiano) Ronaldo.

Në vitin 2020 ai u transferua te Liverpooli - për 45 milionë euro - ku ai la menjëherë gjurmën e tij, duke shënuar gjithashtu golin e 10000-të në historinë e Reds-ave në Ligën e Kampionëve dhe një tregolësh kundër Atalantës.

Autor i 63 golave ​​në Premier League në 190 ndeshje, me Liverpoolin ai fitoi 5 trofe - dy Kupa të Ligës, një Kupë FA dhe një Community Shield - përveç Premier League-ës të fundit në vitin 2025.

Ai gjithashtu përfaqësoi Portugalinë në të gjitha kategoritë e të rinjve, derisa debutoi me ekipin kombëtar në vitin 2019, duke fituar dy Liga të Kombeve UEFA.

Ai kishte luajtur ndeshjen e tij të fundit me ekipin më 8 qershor në finalen e Ligës së Kombeve kundër Spanjës. Fitorja e fundit me Portugalinë e tij të dashur.

Liverpool FC tha se ishte i tronditur nga vdekja tragjike e sulmuesit të tyre portugez Diogo Jota.

“Liverpool FC nuk do të ketë komente të mëtejshme në këtë kohë dhe kërkon që privatësia e familjes, miqve, shokëve të ekipit dhe stafit të Diogos dhe Andres të respektohet, ndërsa ata punojnë për t'u përballur me këtë humbje të paimagjinueshme”, tha klubi në një deklaratë.

Federata Portugeze e Futbollit i ka kërkuar UEFA-s të mbajë një minutë heshtje para ndeshjes midis Portugalisë dhe Spanjës në Kampionatin Evropian të Femrave, në nder të sulmuesit të Liverpoolit dhe ekipit kombëtar, Diogo Jota.

“Federata Portugeze e Futbollit dhe i gjithë futbolli portugez janë thellësisht të tronditur nga vdekja e Diogo Jotës dhe vëllait të tij André Silvës, që ndodhi mbrëmë në Spanjë”, shkroi presidenti i federatës, Pedro Proença, në Facebook.

“Shumë më tepër sesa një lojtar fantastik, me pothuajse 50 paraqitje për ekipin kombëtar, Diogo Jota ishte një person i jashtëzakonshëm, i respektuar nga të gjithë kolegët dhe kundërshtarët e tij”, shtoi ai.

“Kemi humbur dy kampionë. Vdekja e Diogos dhe André Silvës përfaqëson një humbje të pariparueshme për futbollin portugez”, tha ai.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit