SHTETET E BASHKUARA TË MEKSIKËS | FORCAT E POSAÇME “MARINA” SULMUAN BASTIONIN E “EL MAIOS” NË SHTETIN E SINALOAS DUKE VRARË 11 VETA.

Z. Ismael Zambada, i njohur rëndom si “El Maio” (El Mayo).

Kuliakan (Culiacán), Shtetet e Bashkuara të Meksikës | Forcat federale meksikane kryen një operacion të madh në shtetin e Sinaloas, ku një i dyshuar i lidhur me fraksionin “Los Maios” të kartelit Sinaloa u arrestua dhe të paktën 11 kriminelë u vranë gjatë një ndërhyrjeje nga autoritetet.

Sipas burimeve zyrtare të cituara nga enti mediatik meksikan “El Universal”, operacioni u krye nga anëtarë të Marinës (Semar) me mbështetjen e agjencive të tjera të sigurisë.

Me të mbërritur në vendngjarje, Marina u sulmua nga persona të armatosur dhe iu kundërpërgjigj zjarrit, duke vrarë 11 sulmues.

Gjatë operacionit, u sekuestruan gjithashtu armë të kalibrit të madh dhe pajisje taktike.

Njësia mbetet aktive në zonë për të garantuar sigurinë e popullsisë.

Gjatë operacionit, u gjet edhe një grua e identifikuar si Monika (Mónica) Zambada Niebla, vajza e kapobandës Ismael Zambada, i njohur rëndom si “El Maio” (El Mayo).

Autoritetet kanë sqaruar se ajo nuk është e përfshirë në ndonjë aktivitet kriminal dhe as subjekt i ndonjë procedure gjyqësore, dhe për këtë arsye është liruar dhe iu dorëzua familjes së saj në përputhje me procedurat ligjore.

Operacioni është pjesë e një vendosjeje më të gjerë të forcave federale në disa komuna në të gjithë shtetin, ku u gjet edhe një pronë e përdorur nga një qelizë kriminale e lidhur me kapobandën e sipërcituar.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit