SHKODËR-TIRANË | U ARRESTUA HELIDON MARKU; DHUNIM I NJË QYTETARI TE LAGJJA “FRESKU” PËR LLOGARI TË GJOKË NDREVATAJT (ARON NË TIKTOK) DHE XHEMAL UKËS (FIRE NË TIKTOK) - TË CILËT U SHPALLËN NË KËRKIM.

Z. Gjokë Ndrevataj (Aron); z. Xhemal Uka (Fire); z. Helidon Marku.

Shkodër-Tiranë, Shqipëri | Strukturat vendore të Policisë së Shtetit arrestuan:

1- Z. Helidon Marku, me moshë 49 vjeç, me banim në Shkodër.

Ai konsiderohet subjekt i cili ka ekzekutuar një akt kriminal për llogari të dy subjekteve (meshkuj) të njohur virtualisht si “Fire” (z. Xhemal Uka) dhe “Aroni” (z. Gjokë Ndrevataj) duke dhunuar me çekiç në lagjen e Tiranës të njohur si “Fresku” një subjekt (mashkull).

Njoftim | Tiranë.

Zbardhet dinamika e ngjarjes së ndodhur më datë 06.12.2025, te rrethrrotullimi i zonës së Freskut, ku u plagos rëndë, me sende të forta, një 26-vjeçar.

Identifikohen 3 shtetas të përfshirë në këtë rast, konkretisht 2 porositësit e plagosjes dhe njëri nga autorët.

Vihet në pranga ky i fundit dhe punohet intensivisht për kapjen e 2 porositësve.

Të tre shtetasit e përfshirë, me precedentë penal të theksuar për krime kundër personit.

I arrestuari, me precedent edhe për armëmbajtje pa leje.

Procedohet penalisht një shtetas që dyshohet se ka shoqëruar autorin e plagosjes, te vendi i kryerjes së krimit, dhe nuk ka kallëzuar rrethana të rastit.

Si rezultat i veprimeve hetimore të kryera me qëllim zbardhjen e autorësisë dhe rrethanave të plagosjes së rëndë të shtetasit F. Y., me sende të forta, më datë 06.12.2025, te rrethrrotullimi i zonës së Freskut, shërbimet e Komisariatit të Policisë Nr. 4, në kuadër të operacionit “Porosia”, identifikuan 3 shtetas të përfshirë në këtë rast, konkretisht H. M., 49 vjeç, Gj. N., 36 vjeç dhe Xh. U., 30 vjeç.

Nga këto veprime rezultoi se 36-vjeçari dhe 30-vjeçari, për motive të dobëta, kanë porositur shtetasin H. M., për të kryer plagosjen.

Në vijim të veprimeve operacionale, 49-vjeçari u kap dhe u vu në pranga, ndërkaq po punohet për kapjen e shtetasve Gj. N. dhe Xh. U., si dhe për identifikimin dhe kapjen e shtetasve të tjerë që dyshohet se janë përfshirë në plagosjen e 26-vjeçarit.

Gjithashtu, nisi procedimi në gjendje të lirë për shtetasin T. D., 33 vjeç, pasi dyshohet se ka shoqëruar shtetasin H. M., për të kryer krimin, si dhe ka refuzuar të deklarojë në polici, rrethana të kësaj ngjarjeje, për të cilat dyshohet se ka patur dijeni.

Materialet procedurale iu referuan Prokurorisë së Tiranës, për veprime të mëtejshme, thuhet në njoftimin e Policisë së Shtetit.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit