QYTETI I JORKUT TË RI | DONIKE GOCAJ U GJET E VDEKUR NË KRYQËZIMIN E RRUGËS SË 52-TË ME SHËTITOREN (AVENYE) E PESTË NË MANHATAN.

E ndjera

Qyteti i Jorkut të Ri, Amerikë | Strukturat vendore të Policisë morën dijeni se:

1- Znj. Donike Gocaj, me moshë 56 vjeçe, banuese në Barklif (Briarcliff) Manor, u gjet e vdekur në kryqëzimin e Rrugës së 52-të me Shëtitoren (Avenye) e Pestë në Manhatan.

Kumtohet se ajo ra brenda një pusete.

“E mbylli derën e makinës dhe bëri një hap përpara. Papritur u zhduk”, tregoi dëshmitari Karlton Ud (Carlton Wood) për entet mediatike vendore.

“Ajo po bërtiste se po vdiste”, tha ai.

Zjarrfikësit e FDNY organizuan një operacion shpëtimi për ta nxjerrë nga puseta.

Kur u nxor, znj. Donike Gocaj ishte pa ndjenja dhe pa shenja jete.

Ajo u transportua me urgjencë drejt “NewYork-Presbyterian Hospital”, ku më pas u pohua vdekja e saj.

Avokati Kristofër J. Gorajeb (Christopher J. Gorayeb) u shpreh se incidente të ngjashme nuk janë të pazakonta në Jorkun e Ri dhe se kapakët e pusetave duhet të sigurohen në mënyrë që të mos zhvendosen aksidentalisht.

Shoqëria tregtare “Con Edison” deklaroi se, bazuar në pamjet e sistemeve të vëzhgimit dyshohet se kapaku i pusetës ishte zhvendosur pak minuta më herët nga kalimi i një kamioni të rëndë.

Sipas saj, rreth 12 minuta më pas, e ndjera parkoi automjetin pranë vendit ku ndodhi aksidenti fatal.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit