PRESIDENTI VLADIMIR PUTIN: RUSIA DO TË PËRGJIGJET NËSE SHTETET E BASHKUARA OSE VENDE TË TJERA RIFILLOJNË TESTET BËRTHAMORE.

Moskë, Federata Ruse | “Rusia do të reagojë nëse nënshkruesit e Traktatit Gjithëpërfshirës për Ndalimin e Testeve Bërthamore (CTBT) vendosin të rifillojnë testet bërthamore”.

Presidenti rus Vladimir Putin e deklaroi këtë gjatë një takimi me anëtarët e përhershëm të Këshillit të Sigurisë së Federatës Ruse.

“Tashmë në mesazhin tim drejtuar Asamblesë Federale në vitin 2023, deklarova se nëse Shtetet e Bashkuara ose shtetet e tjera palë në Traktat vendosin të kryejnë teste të tilla, Rusia duhet gjithashtu të marrë masa të përshtatshme dhe proporcionale reagimi”, tha Presidenti Putin.

“Dua të theksoj se Rusia gjithmonë i ka respektuar dhe vazhdon t'i respektojë me përpikëri angazhimet e saj sipas Traktatit Gjithëpërfshirës për Ndalimin e Testeve Bërthamore dhe ne nuk kemi ndërmend t'i braktisim këto detyrime”, tha ai më tej.

Ministri rus i Mbrojtjes Andrei Belousov tha se beson se është e përshtatshme të fillojnë përgatitjet për rifillimin e testimeve bërthamore në vendin e testimit Novaya Zemlya, i cili, ndodhet në arkipelagun me të njëjtin emër në Oqeanin Arktik.

“Unë besoj se është e përshtatshme të fillojmë menjëherë përgatitjet për testime bërthamore në shkallë të gjerë”, tha Ministri Belousov gjatë një takimi me Presidentin Putin dhe anëtarët e përhershëm të Këshillit të Sigurisë së Federatës Ruse.

“Shtetet e Bashkuara po i forcojnë në mënyrë aktive armët e tyre strategjike ofensive.

Ne duhet të mbështetemi jo vetëm, apo edhe kryesisht, në deklaratat dhe pretendimet e politikanëve dhe zyrtarëve amerikanë, por mbi të gjitha në veprimet e ShBA-ës.

Dhe këto veprime dëshmojnë pa mëdyshje për forcimin aktiv të armëve strategjike ofensive nga Uashingtoni”, tha Ministri Belousov.

“Shtetet e Bashkuara kanë ndërmend të vendosin raketa në Gjermani të afta të arrijnë Rusinë qendrore në shtatë minuta.

Deri në fund të këtij viti, ushtria amerikane pritet të miratojë një kompleks të ri raketash me rreze të mesme veprimi, ‘Dark Eagle’, të pajisur me raketa hipersonike me një rreze veprimi prej 5500 kilometrash.

Ky sistem është planifikuar më pas të vendoset në Evropë dhe në rajonin e Azi-Paqësorit.

Koha e fluturimit të një rakete të tillë nga Gjermania, ku është planifikuar të vendoset kompleksi, drejt objektivave në Rusinë qendrore do të jetë afërsisht gjashtë deri në shtatë minuta”, deklaroi Ministri i Mbrojtjes Belousov.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit