PRESIDENTI KOLUMBIAN GUSTAVO PETRO KËRKOI NDIHMË NGA SHËRBIMET SEKRETE AMERIKANE PËR TË HETUAR MBI SULMIN ME ARMË ZJARRI NDAJ SENATORIT TË KRAHUT TË DJATHTË MIGUEL URIBE TURABI (TURBAY).

Bogotë, Kolumbi | Presidenti kolumbian Gustavo Petro ka kërkuar mbështetje nga agjencitë e inteligjencës amerikane për të çuar përpara hetimin mbi sulmin e armatosur ndaj senatorit dhe kandidatit për zgjedhjet presidenciale të vitit të ardhshëm, Miguel Uribe Turabi (Turbay), i cili, u krye të shtunën, më 7 qershor, në Bogotë.

“Kam kërkuar nëpërmjet Ambasadës Amerikane që agjencitë sekrete të atij vendi të ndihmojnë thellësisht në hetimin e atentatit të senatorit Uribe Turbai.

Arma e personit të armatosur është blerë në Arizona dhe ka kaluar nëpër Florida”, shkroi presidenti Petro në llogarinë e tij zyrtare në rrjetin social virtual Iks (X).

Kërkesa u bë pasi Gjenerali Karlos (Carlos) Fernando Triana, drejtor i Policisë Kolumbiane, dhe Prokurorja e Përgjithshme e vendit të Amerikës së Jugut Luz Adriana Kamarago (Camargo) njoftuan në një konferencë të përbashkët për shtyp se arma është blerë ligjërisht në Shtetet e Bashkuara më 6 gusht 2020.

Byroja Federale e SHBA-së për Alkoolin, Duhanin, Armët e Zjarrit dhe Eksplozivët (ATF) ka arritur të gjurmojë numrin serial të armës së përdorur në sulm, duke identifikuar blerësin origjinal, i cili është z. Çarls Xhëu (Charles Joe) Anderson, sipas gazetës “El Tiempo”.

“Edhe pse arma ishte blerë ligjërisht në ShBA-ës, autoritetet kolumbiane nuk e regjistruan hyrjen e saj në sistemin e Departamentit Kolumbian të Kontrollit dhe Tregtisë së Armëve, Municioneve dhe Eksplozivëve, që do të thotë se arma e llojit Glock hyri në Kolumbi ilegalisht”, raporton faqja e internetit Infobae.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit