PRESIDENTI BRAZILIAN LUIZ INÁCIO LULA DA SILVA: OPERACIONI POLICOR NË FAVELAT E RIOS ISHTE MASAKËR DHE KATASTROFË.

Brasilia, Brazil | Presidenti brazilian Luiz Inácio Lula da Silva e quajti operacionin policor që javën e kaluar rezultoi në mbi 130 vdekje në dy favela të Rio de Zhaneiros të kontrolluara nga Komanda (Comando) Vermelho, organizata e dytë më e fuqishme kriminale në vend, një masakër.

“Nuk kishte urdhra për të vrarë, megjithatë pati një masakër”, tha Presidenti Lula në një konferencë me shtypin e huaj në Belem, duke i quajtur veprimet policore një katastrofë.

Sipas presidentit Lula, bastisja u krye nga autoritetet shtetërore duke ekzekutuar urdhër-arreste që kërkonin kapjen e dhjetëra anëtarëve të grupit, jo vdekjen e tyre.

Presidenti Lula theksoi se autoritetet federale po hetojnë se si u kryen veprimet dhe u ankua që shumë nga viktimat u varrosën pa autopsi, duke kompromentuar përcaktimin e përgjegjësisë.

Kreu i shtetit theksoi përpjekjet e qeverisë së tij për të forcuar luftën kundër krimit të organizuar, jo vetëm në Brazil, por edhe në të gjithë Amerikën e Jugut dhe përsëriti nevojën për koordinim më të mirë midis forcave federale, shtetërore dhe komunale.

Presidenti Lula kujtoi gjithashtu se dega ekzekutive i kishte paraqitur Parlamentit një projektreformë kushtetuese për të përmirësuar koordinimin e forcave të sigurisë.

Ky propozim u kundërshtua nga disa guvernatorë, veçanërisht ata konservatorë, të cilët, kishin frikë nga një reduktim i autonomisë së tyre në çështjet e sigurisë publike.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit