PORDENONE; ITALI | NJË ISH-SHOFER KAMIONI NËN HETIM PENAL PARAPRAK PËR VRASJE ME SNAJPER NË BOSNJE; AGJENTI 007 EDIN SUBASIÇ RAPORTOI SE KISHTE PASUR KONTAKT ME SISMI-n ITALIAN NË ATË KOHË.

Pamje fotografike amatore nga ajo periudhë kohe

Pordenone, Itali | Në konspiracion me persona të tjerë ende të panjohur, thuhet se ai ka vrarë civilë të paarmatosur, përfshirë gra, të moshuar dhe fëmijë, duke qëlluar me pushkë snajperi nga kodrat përreth Sarajevës midis viteve 1992 dhe 1995, kur qyteti ishte nën rrethim nga serbët e Bosnjës.

Akuza penale e ngritur kundër një ish-shoferi kamioni 80-vjeçar është e tmerrshme.

Ai është personi i parë që hetohet nga Prokuroria Publike e Milanos, e kryesuar nga prokurori Marçelo (Marcello) Viola.

Disa muaj më parë, prokurori Viola filloi të hetonte një tjetër kapitull të errët në luftën në Jugosllavi; rastin e të ashtuquajturve “snajperë të fundjavës”, disa prej të cilëve italianë, të cilët, paguanin për të shkuar dhe për të vrarë, si turistë.

Ish-shoferi i kamionit në pension, i cili, jeton në provincën e Pordenones, një simpatizant dhe nostalgjik për të djathtën ekstreme dhe një entuziast i armëve, u paraqit sot, në kuadër të hetimit nga Karabinierët e ROS-it (Skuadra e Operacioneve Speciale) e koordinuar nga prokurori Alessandro Gobbis, me një thirrje për t'u paraqitur për vrasje me dashje (domethënë, incidente të shumëfishta), të rënduara nga motive të liga, për t'u marrë në pyetje më 9 shkurt nga Zyra e Prokurorit Publik.

Çështja u hap pas një ankese nga shkrimtari Enco Gavaceni (Ezio Gavazzeni), i ndihmuar nga avokatët Nikola Brixhida (Nicola Brigida) dhe Guido Salvini.

Dokumenti përfshinte edhe fjalët e ish-agjentit të inteligjencës boshnjake Edin Subasiç, i cili, raportoi se kishte pasur kontakt me SISMI-n në atë kohë.

Ai shpjegoi se ish-shërbimi sekret italian kishte marrë informacion nga inteligjenca boshnjake në fillim të vitit 1994 se atentatorët turistë po largoheshin nga Trieste.

Dhe se vetë inteligjenca italiane i kishte ndërprerë ato safari të tmerrshme.

Ish-agjenti boshnjak pohoi gjithashtu se mund të ketë dokumente të ruajtura mbi diskutimet midis agjencive të inteligjencës boshnjake dhe italiane, duke përfshirë identifikimet e atyre vrasësve.

Ndërkohë, sipas dokumenteve, ka dalë në pah se i dyshuari u mburr me të tjerët se gjatë asaj periudhe - ai ishte rreth 50 vjeç në atë kohë - ai ishte në kërkim njerëzish në qytetin ish-jugosllav nën kontrollin e trupave të Karaxhiçit dhe Mlladiçit.

Në veçanti, një grua thuhet se i tha një gazetari nga një stacion televiziv vendor friulian se kishte dëgjuar historitë e tij.

Si ajo, ashtu edhe gazetari, i cili, i përshkroi ato si dëshmi rrëqethëse, u intervistuan nga hetuesit.

Kështu, provat përfshijnë dy dëshmitë që identifikuan 80-vjeçarin, si dhe ankesën por edhe një deklaratë nga z. Gavaceni (Gavazzeni), i cili, u mor gjithashtu në pyetje, dhe një seancë dëgjimore nga Adriano Sofri, i cili, ishte dërguar në Sarajevë në atë kohë për të mbuluar luftën.

Gjithashtu duket se gjatë asaj periudhe, ish-shoferi i kamionit udhëtoi disa herë në Jugosllavi, siç raportohet nga njerëz nga kompania e përpunimit të metaleve për të cilën punonte.

Një kontroll në shtëpinë e tij gjeti shtatë armë në pronësi të ligjshme; dy pistoleta, një pushkë dhe katër pushkë gjuetie.

Ndërsa zyra e prokurorit të Milanos po punon për të identifikuar snajperë të tjerë të dyshuar dhe, në veçanti, po verifikon një emër tjetër, hetimi penal paraprak po zgjerohet me bashkëpunim ndërkombëtar.

Autoritetet boshnjake po hetojnë dhe vende të tjera, përfshirë Francën, Zvicrën dhe Belgjikën, po ndërmarrin gjithashtu veprime, sepse snajperët nuk ishin vetëm italianë.

Ndër rrëfimet në dosje është ajo e një ushtari serb të kapur rob, i cili, i tha agjentit boshnjak 007 se kishte qenë personalisht dëshmitar i transportimit të njërit prej gjuetarëve.

Ishte ky dëshmitar okular që foli për italianët që mbërritën nga Milano, Torino dhe Trieste.

Së fundmi, gazetari investigativ kroat Domagoj Margetiç njoftoi në muajt e fundit se po paraqiste një padi kundër Presidentit serb Aleksandar Vuçiç, duke pretenduar përfshirjen e tij në këtë rast, sepse, ai dyshohet se ishte i pranishëm në një nga postet ushtarake në atë kohë.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit