PAPA LEO XIV-të: JAM I ZGJEDHUR PA MERITË; MISIONI IM ËSHTË DASHURIA DHE UNITETI.

Vatikan | “Jam zgjedhur pa asnjë meritë dhe, me frikë e dridhje, vij tek ju si një vëlla që dëshiron të jetë shërbëtor i besimit dhe i gëzimit tuaj, duke ecur me ju në rrugën e dashurisë së Zotit, i cili na dëshiron të gjithëve të bashkuar në një familje”.

Kështu tha Papa Leo XIV-të në meshën që shënonte fillimin e pontifikatit të tij, me fjalë që u përshëndetën me duartrokitjet e besimtarëve.

“Dashuria dhe uniteti: këto janë dy dimensionet e misionit që Jezusi ia besoi Pjetrit”, nënvizoi ai në homeli.

“Nëse shkëmbi është Krishti, Pjetri duhet ta kullotë kopenë pa iu dorëzuar kurrë tundimit për të qenë një udhëheqës i vetëm ose një kryetar i vendosur mbi të tjerët, duke e bërë veten zotërues të njerëzve që i janë besuar”, tha Papa Leo XIV-të në meshën që shënonte fillimin e pontifikatit të tij.

“Përkundrazi - vazhdoi ai në homeli - i kërkohet t’i shërbejë fesë së vëllezërve të tij, duke ecur së bashku me ta: në fakt, të gjithë jemi … gurë të gjallë, të thirrur me Pagëzimin tonë për të ndërtuar ndërtesën e Zotit në bashkim vëllazëror, në harmoninë e Shpirtit, në bashkëjetesën e diversitetit”.

“Kjo, vëllezër e motra, do të doja të ishte dëshira jonë e parë e madhe: një Kishë e bashkuar, shenjë uniteti dhe bashkësie, që bëhet maja për një botë të pajtuar”, tha Papa Leo XIV-të në meshën që shënonte fillimin e pontifikatit të tij.

“Në kohën tonë, ende shohim shumë mosmarrëveshje, shumë plagë të shkaktuara nga urrejtja, dhuna, paragjykimet, frika nga e ndryshme, nga një paradigmë ekonomike që shfrytëzon burimet e Tokës dhe margjinalizon më të varfrit”, shtoi Papa Prevost në homelinë e tij.

“Dhe ne duam të jemi, brenda këtij brumi, një maja e vogël uniteti, bashkësie, vëllazërie. Duam t’i themi botës, me përulësi dhe gëzim: shikoni Krishtin! Afrohuni Atij! Pranoni Fjalën e Tij që ndriçon dhe ngushëllon! Dëgjoni propozimin e Tij të dashurisë për t’u bërë familja e Tij e vetme: në të vetmin Krisht ne jemi një”, tha Papa Leo-të.

“Dhe kjo është rruga që duhet të ndjekim së bashku, midis nesh, por edhe me Kishat e krishtera simotra, me ata që ndjekin shtigje të tjera fetare, me ata që kultivojnë shqetësimin e kërkimit të Zotit, me të gjitha gratë dhe burrat vullnetmirë, për të ndërtuar një botë të re në të cilën mbretëron paqja”, tha Papa XIV-të.

Sipas Papës, ky është shpirti misionar që duhet të na frymëzojë, pa u mbyllur në grupin tonë të vogël ose pa u ndjerë superiorë ndaj botës.

“Jemi të thirrur t’u ofrojmë dashurinë e Zotit të gjithëve, në mënyrë që të arrihet ai unitet që nuk i zhduk dallimet, por përkundrazi, e pasuron historinë personale të çdo personi dhe kulturën shoqërore e fetare të çdo populli”, tha ai.

“Vëllezër, motra, kjo është ora e dashurisë”, thirri Papa Leo XIV-të  në fund të predikimit të tij, gjatë Meshës që shënonte fillimin e pontifikatit të tij.

“Me dritën dhe forcën e Shpirtit të Shenjtë, le të ndërtojmë një Kishë të themeluar mbi dashurinë e Zotit dhe shenjë uniteti, një Kishë misionare që i hap krahët botës, që shpall Fjalën, që lejon veten të shqetësohet nga historia dhe që bëhet maja e harmonisë për njerëzimin”, tha ai.

“Së bashku, si një popull i vetëm, si të gjithë vëllezër, le të ecim drejt Zotit dhe të duam njëri-tjetrin”, tha Papa Leo XIV-të.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit