ORGANIZATA TERRORISTE HAMAS LËSHOI NJË QARKORE TË RE KU U KËRKON ANËTARËVE TË MOS MBAJNË APARATE TË LËVIZSHËM TELEFONIKË NË TAKIMET MES TYRE.

Gazë | Një dokument i brendshëm i organizatës terroriste Hamas, i botuar në gazetën saudite “Asharq Al-Awsat”, kërkon që udhëheqësit e organizatës terroriste jashtë vendit të veprojnë pothuajse në mënyrë klandestine.

Kështu raporton enti mediatik izraelit “Channel 12”.

Ndër të tjera, ata janë të detyruar të zhvillojnë takime pa telefona, pa orë dore dhe në vende ku pajisjet elektronike mbahen larg dhomës.

Burime të larta të organizatës terroriste Hamas i thanë gazetës saudite se shqetësimet po rriten për një sulm të mundshëm ndaj udhëheqësve të organizatës, veçanërisht pas vrasjes së Shefit të Shtabit të Hezbollahut, Ali Tabatabaei.

Sipas tyre, pavarësisht garancive të ShBA-ës ndaj palëve të ndryshme, përfshirë ndërmjetësve në Turqi, Katar dhe Egjipt, se sulmi i shtatorit të kaluar nuk do të përsëritej, udhëheqësit e organizatës terroriste Hamas nuk i besojnë Izraelit.

Burimet vunë në dukje se, pas atentatit në Doha, udhëheqja rriti masat e sigurisë, e bindur se Izraeli do të vazhdojë të monitorojë udhëheqësit e saj dhe t'i gjejë ata duke përdorur metoda të ndryshme, kryesisht teknologji të përparuara.

Një burim vuri në dukje se një atentat ndaj udhëheqësve të organizatës pritet në një vend jo-arab, pa specifikuar se cili.

Gazeta saudite botoi përmbajtjen e dokumentit të brendshëm të shpërndarë midis zyrtarëve të lartë të organizatës terroriste Hamas jashtë vendit, i cili, u kërkon atyre të anulojnë çdo takim të planifikuar në një vend të caktuar dhe të zhvillojnë takime në vende të ndryshme dhe në orare të parregullta.

Për më tepër, zyrtarëve iu kërkua të mbanin aparatet e tyre të lëvizshëm të paktën 70 metra larg vendit të takimit.

Atyre iu ndalua gjithashtu të sillnin pajisje mjekësore ose pajisje të tjera elektronike, përfshirë orët, në dhomat e mbledhjeve dhe të siguroheshin që nuk kishte kondicionerë, ruterë interneti, televizorë apo edhe sisteme interfonike në shtëpi.

Sipas udhëzimeve, udhëheqësit e organizatës terroriste Hamas janë të detyruar të kërkojnë kamera të fshehura në vendin e takimit, nga frika se ato mund të jenë vendosur nga bashkëpunëtorët izraelitë.

Dokumenti i paralajmëron udhëheqësit se Izraeli mbështetet në një sërë faktorësh për të gjurmuar dhe monitoruar individët e kërkuar, duke përfshirë agjentë njerëzorë si pastruesit ose të tjerë, apo edhe ata që punojnë ngushtë me individin e kërkuar.

Fikja e telefonave nuk është një zgjidhje për të ndaluar mbikëqyrjen, veçanërisht pasi çdo pajisje që funksionon nëpërmjet Wi-Fi, duke përfshirë edhe orët inteligjente, mund të hakohet.

Të gjitha këto pajisje mund të përdoren për të përcaktuar numrin e njerëzve në secilën dhomë.

“Raketat e përdorura janë të afta të depërtojnë në çdo mur ose ndërtesë dhe të arrijnë objektivin e tyre në një kohë shumë të shkurtër”, thuhet në të.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit