MEKSIKË: KREU KINEZ I DROGËS ZHI DONG ZHANG U ARRATIS NGA VENDI KU QËNDRONTE ME MASË SIGURIMI “ARREST NË SHTËPI”; PRISTE EKSTRADIMIN NË SHBA-ës; BASHKËPUNËTOR I KARTELEVE SINALOA DHE GJENERATA E RE.

Shtetet e Bashkuara të Meksikës | Qytetari kinez Zhi Dong Zhang, një operativ kyç për Kartelin Sinaloa dhe Kartelin e Gjeneratës së Re Jalisko (CJNG), i arrestuar tetorin e kaluar në Meksiko Siti (Mexico City), iku nga arresti shtëpiak në Cuajimalpa de Morelos, ku mbahej nga Garda Kombëtare.

Enti mediatik “Infobae” raporton këtë.

Ai konsiderohet si një ndërmjetës që menaxhonte rrugë kritike kimike drejt laboratorëve klandestinë të drogës sintetike në Meksikë për kartelet, duke luajtur një rol kyç në trafikun transnacional të drogës.

Në kohën e arrestimit të tij, ai u akuzua për eksportim, transportim dhe shpërndarje të dyshuar të 1800 kilogramëve fentanil, mbi 600 kilogramëve metamfetaminë dhe më shumë se një ton kokainë, duke përfituar ilegalisht të paktën 150 milionë dollarë në vit nga trafiku i drogës.

Ai ka një urdhër arresti për trafik droge dhe pastrim parash të lëshuar nga Zyra e Prokurorit të ShBA-ës në Atlanta, ku ai priste ekstradimin ndërsa aktivitetet e tij të paligjshme shtriheshin përtej Amerikës në Evropë, Kinë dhe Japoni.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit