MBRETËRIA E SPANJËS | KRYEMINISTRI PEDRO SANÇEZ (SÁNCHEZ) NJOFTOI NDALIMIN E QASJES (AKSESIT) NË RRJETET SOCIALE VIRTUALE PËR TË MITURIT NËN 16 VJEÇ.

Madrid, Mbretëria e Spanjës | Kryeministri Pedro Sançez (Sánchez) njoftoi se qeveria spanjolle do të ndalojë aksesin në rrjetet sociale virtuale për të miturit nën moshën 16 vjeç dhe do të forcojë sanksionet kundër platformave dixhitale që nuk arrijnë të heqin përmbajtjen e urrejtjes ose atë të paligjshme.

Njoftimi u bë në Dubai gjatë Samitit Botëror të Qeverive dhe paketa e masave pritet të miratohet nga Këshilli i ardhshëm i Ministrave.

Sipas Kryeministrit Sançez (Sánchez), qëllimi është mbrojtja e të miturve nga rreziqet që lidhen me përdorimin e hershëm të mediave sociale dhe kundërshtimi i përhapjes së mesazheve të urrejtjes dhe polarizuese në hapësirën dixhitale.

Rregullat e reja do të kërkojnë që platformat të miratojnë sisteme efektive të verifikimit të moshës për të parandaluar aksesin nga të miturit që nuk i plotësojnë kërkesat ligjore.

Plani i qeverisë përfshin gjithashtu krijimin e mekanizmave për të monitoruar dhe ndjekur përmbajtjen e urrejtjes, duke lehtësuar identifikimin dhe heqjen e saj.

Qeveria gjithashtu synon të bashkëpunojë me Zyrën e Prokurorit Kombëtar për të shqyrtuar veprimet ligjore kundër kompanive të teknologjisë që nuk i përmbushin detyrimet e tyre ligjore.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit