KUBË | PARTIA KOMUNISTE: 28% E POPULLSISË (2.7 MILIONË NJERËZ) NUK KA QASJE NË UJIN E PIJSHËM; FAJIN E KANË IMPERIALISTËT AMERIKANË.

Havanë, Kubë | Qeveria raportoi se afërsisht 28% e popullsisë përballet me probleme me ujin e rrjedhshëm për shkak të krizës energjitike, e përkeqësuar nga bllokada e naftës e imponuar nga ShBA-ës dhe sanksionet më të fundit ekonomike.

Sipas të dhënave të publikuara në televizionin shtetëror nga z. Antonio Rodriguez, president i Institutit Kombëtar të Burimeve Hidraulike (INRH), afërsisht 2.7 milionë njerëz përballen me vështirësi në aksesin ndaj ujit të pijshëm të rregullt.

Ai shpjegoi se mungesat e karburantit dhe ndërprerjet e energjisë po kompromentojnë funksionimin e stacioneve të pompimit, impianteve të trajtimit dhe sistemeve të shpërndarjes së ujit.

Deficiti i energjisë ka çuar gjithashtu në një rritje të dështimeve të pajisjeve dhe tubacioneve.

Sipas qeverisë, vështirësitë në aksesin në financim ndërkombëtar dhe tërheqja e disa furnizuesve të huaj kanë përkeqësuar gjithashtu situatën në sektorin e ujit, i cili konsiderohet ndër më të goditurit nga kufizimet e ShBA-ës.

Autoritetet kanë njoftuar qëllimin e tyre për të përshpejtuar kalimin në burime të rinovueshme, duke synuar të furnizojnë me energji 52% të afërsisht 3300 stacioneve të pompimit të vendit me energji të pastër.

Mungesa e karburantit ka shkaktuar ndërprerje të përditshme që zgjasin më shumë se 20 orë në disa rajone të ishullit, duke nxitur pakënaqësinë sociale dhe duke paralizuar sektorë të mëdhenj të ekonomisë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit