KOLUMBI: SENATORI KONSERVATOR URIBE TURBAI (VIKTIMË E SULMIT TË ARMATOSUR TË 7 QERSHORIT) VDIQ NË SPITAL.

Bogotë, Kolumbi | Senatori kolumbian Miguel Uribe Turbai (Turbay), viktimë e një sulmi më 7 qershor, vdiq këtë mëngjes në Bogota.

Gruaja e tij, Maria Klaudia (Claudia) Tarazona konfirmoi vdekjen e tij.

“Do të jesh gjithmonë dashuria e jetës sime. Faleminderit që na dhe një jetë plot dashuri, faleminderit që ishe baba për vajzat tona, babai më i mirë për Alejandro-n”, shkroi znj. Tarazona.

Senatori Uribe Turbai u godit me tre të shtëna me armë zjarri, dy në kokë dhe një në këmbë.

I shtruar me urgjencë në Spitalin e Fondacionit Santa Fe, senatori iu nënshtrua procedurave neurokirurgjikale dhe vaskulare, si dhe një ndërhyrjeje kirurgjikale në kofshën e majtë, por raportet mjekësore e përshkruanin vazhdimisht gjendjen e tij si kritike.

Raporti i fundit, i botuar më 9 gusht, vuri në dukje se ai kishte pësuar një hemorragji në sistemin nervor qendror, duke kërkuar ndërhyrje të mëtejshme kirurgjikale urgjente.

Sulmuesi, një djalë nën 15 vjeç, u arrestua pas një shkëmbimi zjarri me truprojën e senatorit.

Sipas hetuesve, të paktën dhjetë persona ishin të përfshirë në sulm, por deri më sot janë arrestuar shtatë, tre prej të cilëve të mitur.

Senatori Miguel Uribe Turbai, i lindur në vitin 1986, ishte djali i znj. Diana Turbai, një gazetare e njohur, e rrëmbyer në vitin 1991 nga trafikanti i drogës Pablo Emilio Eskobar Gaviria dhe e vrarë prej tij.

Gjyshi i senatorit nga nëna, Julio Sesar Turbai Aiala (Cesar Turbay Ayala), ishte president i Kolumbisë nga viti 1978 deri në vitin 1982.

Politikani ishte paraqitur si një kandidat i mundshëm presidencial në emër të partisë konservatore të Qendrës Demokratike (Cd).

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit