JAPONI | TOKIO THIRRI AMBASADORIN KINEZ TË CILIT I DORËZOI NJË NOTË PROTESTE NË LIDHJE ME SHENJËSTRIMIN E AVIONËVE JAPONEZË.

Tokio, Japoni | Tensionet mbeten të larta midis Tokios dhe Pekinit pas incidentit të fundit gjatë fundjavës, ku avionët ushtarakë të Pekinit shënjestruan avionë luftarakë japonezë në ujërat në juglindje të Okinaua-s.

Të dielën, qeveria e Tokios thirri ambasadorin kinez për t’i paraqitur një protestë të fortë për incidentin, duke i quajtur manovrat jashtëzakonisht të mjerueshme dhe duke i kërkuar Pekinit të parandalojë që incidente të ngjashme të ndodhin përsëri.

Ministri i Mbrojtjes Shinjiro Koizumi e quajti incidentin të rrezikshëm dhe absolutisht të papranueshëm, duke shtuar se veprime të tilla rrezikojnë të shkaktojnë incidente të paparashikuara në rajon, Detin e Kinës Lindore, i cili tashmë është shënuar nga tensione strategjike.

Incidenti, i cili, ndodhi të shtunën, u konfirmua nga Ministria Japoneze e Mbrojtjes.

Forcat ajrore kineze aktivizuan dy herë radarët e kontrollit të zjarrit që synonin avionët e Forcës Japoneze të Vetëmbrojtjes.

Nga ana e saj, Marina Kineze hodhi poshtë akuzat e Tokios, duke pretenduar se versioni japonez është plotësisht në kundërshtim me faktet dhe shprehu një kërkesë solemne që Tokio të ndërpresë menjëherë atë që e quan një fushatë shpifjeje.

Sipas një oficeri në aeroplanmbajtësen kineze Liaoning, të intervistuar nga transmetuesi publik japonez “NHK”, gjatë manovrave të njoftuara rregullisht në ujërat ndërkombëtare, avionët e Forcës Japoneze të Vetëmbrojtjes Ajrore iu afruan vazhdimisht hapësirës ajrore dhe detare të caktuar për stërvitjen e marinës së Pekinit, duke penguar operacionet dhe duke kërcënuar seriozisht sigurinë e fluturimit.

Incidenti vjen mes tensioneve në rritje midis dy vendeve.

Marrëdhëniet diplomatike janë përkeqësuar gjatë muajit të kaluar pas deklaratave të kryeministres japoneze Sanae Takaiçi (Takaichi) se Tokio mund të ndërhyjë ushtarakisht në rast të një sulmi ndaj Tajvanit, një deklaratë që Pekini e ka karakterizuar si një ndërhyrje serioze në punët e brendshme të tij.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit