JAPONI | PARLAMENTI MIRATOI RISHIKIMIN E LIGJIT TË FAMILJES PERANDORAKE SUNDIMI I SË CILËS FILLON NË VITET 600 PARA KRISHTIT; TRASHËGIMI VETËM PËR BURRAT.

Tokio, Japoni | Parlamenti miratoi një rishikim të Ligjit të Familjes Perandorake për të kundërshtuar zvogëlimin progresiv të numrit të anëtarëve të familjes, duke konfirmuar parimin e trashëgimisë ekskluzivisht mashkullore, pavarësisht se një pjesë e konsiderueshme e opinionit publik mbetet në favor të pranimit të grave në Fronin e Krizantemës.

Amendamenti (i cili konsiderohet ndryshimi i parë i rëndësishëm në legjislacionin e vitit 1947) prezanton dy risi kryesore:

1- Lejon hyrjen në familjen perandorake të pasardhësve meshkuj nga ana e babait nga 11 ish-degë anësore, të përjashtuara nga reforma e pasluftës.

Të adoptuarit duhet të jenë të paktën 15 vjeç, të pamartuar dhe pa fëmijë.

Ndërsa nuk mund të hipin drejtpërdrejt në fron, pasardhësit e tyre të ardhshëm meshkuj do të jenë të kualifikuar për trashëgimi.

2- Garanton të drejtën e princeshave për të ruajtur gradën perandorake edhe nëse martohen me një person të thjeshtë, gjë që deri më tani ka qenë një arsye automatike për t'u larguar nga familja mbretërore.

Masa, e paraqitur nga qeveria si e nevojshme për të siguruar stabilitetin dinastik duke pasur parasysh numrin e kufizuar të aspirantëve për fron, megjithatë nuk adreson çështjen më të diskutueshme, atë të përjashtimit të grave nga linja e trashëgimisë.

Aktualisht, ka vetëm tre trashëgimtarë të kualifikuar, të gjithë meshkuj, përfshirë Princin e Kurorës Akishino dhe djalin e tij Hisahito.

Sondazhet e fundit tregojnë se afërsisht 70% e japonezëve favorizojnë hipjen në fron të një sovraneje femër, por analistët besojnë se qarqet konservatore dhe nacionaliste pranë qeverisë së kryeministres Sanae Takaiçi (Takaichi) kanë ushtruar presion për të ruajtur traditën e lashtë.

Në këtë kontekst, qeveritë e mëparshme e kishin shtyrë vazhdimisht masën, duke e konsideruar atë shumë të ndjeshme politikisht dhe kulturorisht.

Froni i Krizantemës konsiderohet monarkia më e vjetër e trashëgueshme e vazhdueshme në botë.

Tradita i ka rrënjët e saj që në vitin 660 para Krishtit, pa ndërprerje në linjën dinastike.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit