ISHULLI I ZAQINTHOSIT; GREQI | ZJARR PYJOR SHPËRTHEU MIDIS FSHATRAVE LITHAKIA + AGALA + KILIOMENO NË JUGPERËNDIM TË ISHULLIT.

Ishulli Zaqinthos, Greqi | Zjarrfikësit në ishullin grek të Zaqinthos në Detin Jon po përpiqen të përmbajnë një zjarr pyjor që shpërtheu midis fshatrave Lithakia, Agala dhe Kiliomeno në jugperëndim të ishullit.

Tridhjetë e pesë zjarrfikës, pesë aeroplanë dhe tre helikopterë janë në vendngjarje për të shuar flakët.

Kështu raporton transmetuesi shtetëror “ERT”.

Autoritetet greke kanë urdhëruar evakuimin e të paktën dy vendbanimeve, përfshirë disa hotele në zonën e Apelatit, ndërsa flakët kanë përfshirë fshatin tashmë të evakuuar të Agalas.

“Erërat janë shumë të forta dhe zjarri është jashtë kontrollit: zjarri aktualisht është afër shtëpive dhe i gjithë fshati i Agalas është i kërcënuar sepse pylli ngjitur po digjet”, tha për entin mediatik “ERT” kryetari i bashkisë së Zaqinthosit, Jorgos Stasinopulos (Giorgos Stasinopoulos), duke shpjeguar se ishulli kërkon mbështetje shtesë ajrore për të shuar zjarrin.

Sipas transmetuesit televiziv “ERT”, përforcimet e zjarrfikësve po arrijnë në ishull nga deti pasi u nisën nga porti i Killini-t, në bregdetin perëndimor të Peloponezit.

Për shkak të temperaturave të larta dhe erërave të forta që fryjnë aktualisht në Greqi, Agjencia e Mbrojtjes Civile e ka përshkruar rrezikun e zjarreve të reja në disa zona të vendit si shumë të lartë.

Zjarrfikësit aktualisht po luftojnë me zjarret që shpërthejnë në rajone të shumta, duke përfshirë dy pranë Artës dhe Prevezës dhe një pranë Patrës në Peloponez.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit