ISH-DREJTORI I INSTITUCIONIT TË EKZEKUTIMEVE TË VENDIMEVE PENALE TË DURRËSIT INDRIT CËRRLOJ U ARRESTUA | MASA ERDHI PAS ARRATISJES SË VRASËSIT TË DISA FISHTË ALTIN NDOCI.

 Z. Indrit Cërrloj

Durrës, Shqipëri | Strukturat vendore të Policisë së Shtetit arrestuan:

1- Ish-drejtorin e Institucionit të Ekzekutimeve të Vendimeve Penale të Durrësit, Indrit Cërrloj.

Arrestimi i tij lidhet me arratisjen e:

1- Të burgosurit Altin Ndoci; në datën 13 janaar 2026.

Fillimisht ai u shkarkua nga detyra me urdhër të ministrit të Drejtësisë, Besfort Lamallari.

Tashmë, hetimet penale paraprake ndaj tij do të zhvillohen me masë sigurimi “arrest në burg”.

Njoftim | Durrës.

Lokalizohet, kapet dhe vihet në pranga ish-drejtori i IEVP Durrës.

Ekzekutohet masa e sigurisë edhe për doktoreshën e IEVP Durrës.

Specialistët e Seksionit për Hetimin e Krimeve Ekonomike dhe Financiare, në bashkëpunim me Seksionin për Mbështetjen Operacionale në Drejtorinë Vendore të Policisë Durrës, bënë të mundur lokalizimin dhe kapjen e shtetasit I. C., 48 vjeç, banues në Durrës, ish-drejtor i IEVP Durrës.

Për këtë shtetas, Gjykata e Shkallës së Parë e Juridiksionit të Përgjithshëm Durrës, me vendimin nr. 19/1, datë 15.01.2026, ka caktuar masën e sigurisë “Arrest në burg”, për veprën penale “Shpërdorimi i detyrës”.

Gjithashtu, me të njëjtin vendim, kjo gjykatë ka caktuar masën e sigurisë “Arrest në shtëpi” për shtetasen Y. S., 66 vjeçe, banuese në Durrës, doktoreshë në IEVP Durrës, për veprën penale “Shpërdorimi i detyrës”.

Materialet do t’i kalojnë Prokurorisë së Juridiksionit të Përgjithshëm Durrës, për veprime të mëtejshme, thuhet në njoftimin e Policisë së Shtetit.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit