GROENLANDË | KRYEMINISTRI JENS-FREDERIK NIELSEN: NUK NA DUHET ANIJA SPITALORE E PRESIDENTIT TRAMP (TRUMP); TË FLASI ME NE DHE TË MOS POSTOJË GJËRA TË RASTËSISHME NË RRJETET SOCIALE VIRTUALE.

Nuuk, Groenlandë | “Nga ana jonë, përgjigjja është jo, faleminderit.

Ne e kemi marrë parasysh idenë e Presidentit Tramp (Trump) për të dërguar një anije spitalore amerikane në Groenlandë.

Megjithatë, ne kemi një sistem publik të kujdesit shëndetësor që u ofron trajtim falas qytetarëve.

Kjo është një zgjedhje e qëllimshme dhe një pjesë themelore e shoqërisë sonë.

Ky nuk është rasti në Shtetet e Bashkuara, ku të shkosh te mjeku kushton para”.

Kështu tha Kryeministri i Groenlandës, Jens-Frederik Nielsen, në një postim në rrjetin social virtual “Facebook”.

“Ne jemi gjithmonë të hapur për dialog dhe bashkëpunim, përfshirë edhe me Shtetet e Bashkuara.

Por ju lutemi flisni me ne në vend që të bëni deklarata pak a shumë të rastësishme në mediat sociale. Dialogu dhe bashkëpunimi kërkojnë respekt për faktin se vendimet për vendin tonë merren këtu, në pragun tonë”, shtoi ai.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit