EKUADOR | SINDIKATAT DHE GRUPET INDIGJENE I KËRKUAN KËSHILLIT KOMBËTAR ZGJEDHOR SHKARKIMIN E PRESIDENTIT DANIEL NOBOA.

Kuito, Ekuador | Sindikatat, organizatat indigjene dhe lëvizjet shoqërore në Ekuador i kanë paraqitur një kërkesë zyrtare Këshillit Kombëtar Zgjedhor për të filluar procesin e shkarkimit të presidentit Daniel Noboa dhe zv.presidentes Maria Jose Pinto.

Iniciativa vjen në një sfond tensionesh politike në rritje dhe një krize të vazhdueshme sigurie në vend.

“Shpresojmë që Këshilli Zgjedhor do të mbështesë Kushtetutën dhe do ta ndjekë këtë kërkesë”, tha presidenti i Sindikatës së Përgjithshme të Punëtorëve të Ekuadorit (UGTE), Jose Villavicencio, gjatë një konference për shtyp të raportuar nga enti mediatik vendor “El Diario”.

Bashkimi Kombëtar i Edukatorëve (UNE) dhe Konfederata Kombëtare e Organizatave Fshatare, Indigjene dhe të Zeza të Ekuadorit (FENOCIN) gjithashtu iu bashkuan kërkesës.

Sipas UNE-s, vendi po përjeton një përkeqësim të ndjeshëm të situatës sociale dhe të sigurisë, duke justifikuar një kërkesë për përfundimin e parakohshëm të mandatit presidencial.

Që procesi të vazhdojë, promotorët do të duhet të mbledhin një numër nënshkrimesh të barabartë me të paktën 15% të elektoratit, ekuivalent me afërsisht dy milionë nënshkrime.

Kushtetuta e Ekuadorit lejon që shkarkimi i një presidenti të iniciohet pas vitit të parë të detyrës dhe deri në një vit para përfundimit të mandatit të tij.

Presidenti Noboa, i rizgjedhur në vitin 2025, do të mbetet në detyrë deri në vitin 2029, në varësi të çdo zhvillimi në iniciativë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit