EKUADOR | LARJE HESAPESH MES AGJENTURËS SË KRIMIT ORDINER; TETË TË VRARË ME ARMË ZJARRI PËRPARA NJË DISKOTEKE (MES TYRE EDHE VËLLAI I KRYETARIT TË BASHKISË).

Kuito, Ekuador | “Tetë persona u vranë sot kur një grup burrash të armatosur hapën zjarr përpara një klubi nate në një komunitet rural në Ekuadorin jugperëndimor”, tha policia.

Autorët e krimit mbërritën në vendngjarje me dy furgonë dhe hapën zjarr ndaj një grupi personash që po pinin alkool në rrugë, përpara hyrjes së diskotekës, rreth orës 1:15 të mëngjesit (ora lokale/ 9:15 e mëngjesit sipas orës shqiptare) në qytetin Shën Luçia (Santa Lucia) në provincën e Guaias (Guayas).

“Oficerët gjetën disa persona të plagosur dhe shtatë trupa me të mbërritur në vendngjarje”, tha gjenerali i brigadës së policisë Javier Çango (Chango) në një konferencë për shtyp.

“Një person i tetë ndërroi jetë nga plagët e marra ndërsa po trajtohej në një spital vendor”, shtoi ai.

Midis të vdekurve është një burrë i identifikuar si Jorge Urkuijo (Urquijo), vëllai i kryetarit të bashkisë së qytetit me 38000 banorë dhe pronar i klubit të natës.

Policia gjeti rreth 80 gëzhoja 9 mm dhe armë automatike në vendngjarje.

“Pas sulmit, personat e armatosur u kthyen në automjetet e tyre dhe ikën nga një rrugë e panjohur”, shtoi gjenerali i brigadës.

Në atë zonë, autoritetet arrestuan një person të armatosur me revolver i cili po udhëtonte në një kamionetë, por ata nuk ishin në gjendje të përcaktonin nëse ky burrë ishte i përfshirë në sulm.

Policia ende nuk ka përcaktuar shkakun e masakrës.

Qyteti i Shën Luçisë (Santa Lucias) shpalli sot një ditë zie.

“Ne bashkohemi në pikëllimin dhe lutjen tonë përballë këtij akti të dhunshëm që ka prekur komunitetin tonë”, shkroi zyra e kryetarit të bashkisë Ubaldo Urkuijo (Urquijo) në mediat sociale.

Guaias është një nga katër provincat në të cilat Presidenti Daniel Noboa kohët e fundit zgjati gjendjen e jashtëzakonshme për dy muaj me qëllim luftimin e dhunës së bandave.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit