E TËRË REPUBLIKA DOMENIKANE PA ENERGJI ELEKTRIKE | NJË NGA SHKAQET LIDHJET E PALIGJSHME.

Santo Domingo, Republika Domenikane | Një defekt në sistemin kombëtar të energjisë elektrike e ka lënë të gjithë Republikën Dominikane pa energji, duke paralizuar jetën e përditshme dhe shërbimet thelbësore.

Kompania e transmetimit elektrik Eted ia atribuoi ndërprerjen një defekti serioz në njësitë San Pedro de Makoris (Macorís) dhe Kuiskueia (Quisqueya), i cili, shkaktoi një reaksion zinxhir, duke shkëputur të gjitha impiantet e transmetimit dhe gjenerimit në vendin e Karaibeve.

Sipas Ministrit të Energjisë dhe Minierave Joel Santos Eçeverria (Echeverría), ndërprerja ndodhi të martën, më 11 nëntor, në orën 13:20 sipas orës vendore.

Ekipet teknike u mobilizuan menjëherë për të rivendosur rrjetin, por nuk është caktuar ende një afat kohor për rifillimin e plotë të shërbimit.

Kryeqyteti, Santo Domingo, ishte ndër zonat më të goditura; semaforët u fikën, trafiku u bllokua, metroja dhe teleferiku u pezulluan, duke i detyruar autoritetet të evakuonin pasagjerët në përputhje me protokollet e emergjencës.

Spitalet, bankat dhe bizneset gjithashtu u detyruan të mbështeteshin te gjeneratorët, ndërsa pjesa më e madhe e popullsisë mbeti pa energji për orë të tëra.

Sipas Eted-it, incidenti është i paprecedentë dhe do të jetë subjekt i një hetimi teknik për të përcaktuar shkaqet e tij.

Ndërprerja e energjisë elektrike, në një vend me një përzierje të larmishme energjie, ka rindezur debatin mbi problemet strukturore të sektorit të energjisë elektrike, duke përfshirë mungesën e mirëmbajtjes dhe lidhjet e paligjshme.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit