BRAZILI LIDHI MARRËVESHJE ME KINËN PËR TË HAPUR EKSPORTET E ETANOLIT.

Rio De Zhanerio, Brazil | Ministri i Energjisë i Brazilit, Aleksandre (Alexandre) Silveira, ka nënshkruar një memorandum mirëkuptimi me Administratën Kombëtare të Energjisë të Kinës (NEA) me qëllim hapjen e tregut kinez për etanolin brazilian në një kohë vendimtare kur Pekini po rrit sasinë e karburantit miqësor ndaj mjedisit në përzierjen e benzinës që shitet në vend në 10%.

Dokumenti njeh rëndësinë strategjike të bioetanolit për lëvizshmërinë me karbon të ulët, duke kontribuar në tranzicionin energjetik dhe luftën kundër ndryshimeve klimatike.

“Brazili është një udhëheqës botëror në prodhimin e etanolit dhe biokarburanteve dhe ne duam të bashkëpunojmë me Kinën për të promovuar dekarbonizimin e sektorit të lëvizshmërisë, ashtu siç kemi bërë këtu me programin Karburanti i së Ardhmes.

Përveç kësaj, duke rritur eksportet, ne po gjenerojmë vende pune dhe të ardhura për vendin tonë përgjatë gjithë zinxhirit të sheqerit dhe energjisë, një aspekt kyç për zhvillimin ekonomik dhe social”, tha z. Silveira.

Nënshkrimi u zhvillua në kuadër të vizitës shtetërore të presidentit Luiz Inacio Lula da Silva në Kinë.

“Shkëmbimi midis vendeve synon gjithashtu të mbështesë formulimin dhe harmonizimin e kornizave rregullatore, të inkurajojë partneritetet dhe investimet dypalëshe dhe të forcojë kapacitetet teknike dhe institucionale”, përfundon shënimi i ministrisë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit