BERLIN | ISH-PRESIDENTI I BANKËS QENDRORE EVROPIANE MARIO DRAGHI U VLERËSUA ME ÇMIMIN “CHARLEMAGNE” (ÇMIMI I KARLIT TË MADH); DEKLAROI SE EVROPA SI KURRË MË PARË KA SHUMË ARMIQ.

Berlin, Republika Federale e Gjermanisë | “Ky vendim vjen në një kohë kur Evropa ka shumë armiq, ndoshta më shumë se kurrë, si të brendshëm ashtu edhe të jashtëm”.

Ish-kryeministri Mario Draghi e bëri këtë deklaratë në një mesazh video të transmetuar gjatë shpalljes së fituesit të Çmimit Charlemagne.

Kështu njoftoi agjencia gjermane e lajmeve “dpa”.

“Për të ruajtur Bashkimin Evropian, evropianët duhet të jenë më të bashkuar se kurrë”, tha ai.

“Jashtëzakonisht mirënjohës për çmimin. Ne duhet të kapërcejmë dobësitë tona të vetëshkaktuara. Dhe ne duhet të bëhemi më të fortë; ushtarakisht, ekonomikisht dhe politikisht”, tha ai.

Çmimi, i marrë vitin e kaluar nga Presidentja e Komisionit Evropian Ursula von der Leien (Leyen), dhe më parë nga ish-Kancelarja Angela Merkel, Papa Françesku dhe Presidenti Volodimir Zelenski, do të dorëzohet më 14 maj.

“Si askush tjetër, Mario Draghi është sinonim i forcimit ekonomik të Evropës dhe 'Raporti Draghi' i vitit 2024, i emëruar sipas tij, përfaqëson strategjinë e nevojshme për të siguruar konkurrueshmërinë, rritjen dhe stabilitetin në Bashkimin Evropian”, thuhet në citimin e botuar në faqen e internetit të Çmimit.

“Në njohje të shërbimit të tij të jashtëzakonshëm ndaj Bashkimit Evropian dhe në njohje të kontributeve të tij historike në ruajtjen, konsolidimin dhe zhvillimin e Bashkimit Ekonomik dhe Monetar Evropian si një element qendror dhe i domosdoshëm i integrimit, Këshilli Drejtues i Shoqërisë për Çmimin Ndërkombëtar të Karlit të Akenit (Aachenit) do të nderojë ish-Presidentin e Bankës Qendrore Evropiane dhe ish-Kryeministrin e Republikës Italiane, Profesor Mario Draghi, në vitin 2026.

Në kohë pasigurie dhe sfidash të mëdha, ne kemi nevojë për ndërmjetës, vizionarë dhe mendimtarë strategjikë që mund të përcaktojnë qartë rrugë konkrete për t'u ndjekur, si dhe vendimmarrës dhe zbatues të guximshëm!

Figura të shquara që, në momente historike vendimtare kur një projekt shekullor rrezikon dështimin, marrin përgjegjësi, edhe kur konsensusi publik dhe ai i pjesës më të madhe të klasës politike janë larg të qenit të sigurt.

Rreth një dekadë e gjysmë më parë, Bashkimi Evropian po përballej tashmë me një situatë të ngjashme dhe Mario Draghi mori përgjegjësinë!

Çfarëdo që të duhet! Këto tre fjalë përfaqësojnë jo vetëm shpëtimin e euros, por edhe një qëndrim guximi dhe gatishmërie për të marrë rreziqe për bindjet e Evropës.

Dhe sot, gjithashtu, Draghi është një nga figurat kryesore që i tregon përsëri Bashkimit rrugën drejt një konkurrueshmërie më të madhe, më shumë solidariteti dhe më shumë Evropë”, thuhet po atje.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit