AUTORITETET RUSE TË HETIMIT PENAL NË BASHKËPUNIM ME FSB-në HAPËN HETIMIN E PARË PENAL TË NJOHUR BOTËRISHT MBI KËRKIMET ONLINE PËR MATERIALE TË KONSIDERUARA SI EKSTREMISTE.

Moskë, Federata Ruse | Një subjekt (mashkull), avokati i të cilit thotë se rastësisht ka hasur në informacione rreth njësive luftarake pro-ukrainase ndërsa shfletonte internetin në një autobus, është qytetari i parë rus i njohur botërisht që hetohet sipas një ligji që ndalon kërkimet online për materiale që Moska i quan ekstremiste.

Mediat ruse cituan z. Sergei Barsukov, një avokat në rajonin Sverdlovsk të Uraleve, të ketë thënë se ai po përfaqësonte 20-vjeçarin Sergei Glukhikh, i cili, ishte raportuar nga ofruesi i tij i shërbimit të internetit në shërbimin e sigurisë FSB për shikimin e informacionit në lidhje me njësitë që Rusia i konsideron si terroriste.

Agjencia e lajmeve “Ostorozhno Novosti” citoi z. Barsukov të thoshte se klienti i tij nuk kishte qëllim keqdashës dhe ankohej se hetuesit kishin ushtruar presion psikologjik mbi të.

Rusia ka futur ligje censure që nga pushtimi i Ukrainës në vitin 2022, të cilat, i bëjnë njerëzit të nënshtruar ndaj gjobave ose dënimeve të gjata me burgim nëse diskreditojnë forcat e armatosura ruse ose përhapin informacion me vetëdije të rremë në lidhje me luftën.

Një ligj i ri i miratuar në korrik përcakton gjoba deri në 5000 rubla (61.50 dollarë) për njerëzit që kërkojnë me vetëdije materiale ekstremiste në internet.

Edhe pse gjoba është e vogël, kritikët thonë se ky veprim mund të përdoret si pretekst për të vënë njerëzit nën hetim dhe për të hapur derën për akuza dhe dënime më të rënda.

Avokati Barsukov tha se ende nuk është dhënë asnjë vendim gjyqësor për çështjen e klientit të tij, por shumë njerëz do të vuajnë padrejtësisht si rezultat i legjislacionit.

“Imagjinoni sikur jam një studiues dhe po përgatis një artikull rreth organizatave të ndaluara. Dhe rezulton se jam i pambrojtur - një operator (interneti) më raporton tek forcat e rendit.

Është koha për të ndaluar këtë farsë dhe për të ndaluar zvarritjen e qytetarëve të mirë nëpër gjykata”, tha ai.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit