ASAMBLEJA E PËRGJITHSHME E OKB-së: RUSIA TË KTHEJË FËMIJËT E RRËMBYER NË UKRAINË.

Jorku i Ri, Amerikë | Asambleja e Përgjithshme e OKB-së votoi të mërkurën për të kërkuar që Rusia të kthejë të gjithë fëmijët ukrainas të deportuar ose të transferuar me forcë që nga fillimi i luftës.

Rezoluta u miratua me 91 vota pro, 12 kundër dhe 57 abstenime, duke përmbushur shumicën prej dy të tretash të kërkuar sipas Nenit 18 të Kartës së OKB-së.

Rezoluta kërkon që Rusia të sigurojë kthimin e menjëhershëm, të sigurt dhe të pakushtëzuar të të gjithë fëmijëve ukrainas që janë transferuar me forcë ose janë deportuar.

Asambleja e Përgjithshme, gjatë seancës së jashtëzakonshme, i kërkoi gjithashtu Rusisë të ndërpresë çdo praktikë të ngjashme.

Presidentja e Asamblesë së Përgjithshme, Annalena Baerbok (Baerbock) deklaroi se:

1- “Ajo që po dëshmojmë nuk është thjesht një tragjedi e disa fëmijëve, por një shkelje e së drejtës ndërkombëtare”.

Rusia e kundërshtoi rezolutën.

Ambasadorja Maria Zabolotskaia (Zabolotskaya) tha se:

1- “Çdo votë për rezolutën është mbështetje për gënjeshtrat, luftën dhe konfrontimin”.

Ajo pretendoi se rezoluta bie ndesh me përpjekjet aktuale për paqe.

Një raport i Komisionit të Pavarur Ndërkombëtar të Hetimit mbi Ukrainën, i dorëzuar në vitin 2023, dokumentoi transferimin e 31 fëmijëve nga Ukraina në territorin rus në muajin maj të vitit 2022, duke arritur në përfundimin se kjo përbënte krim lufte.

Komisioni i Hetimit sqaroi më tej se të kuptuarit e shkallës së transferimeve të fëmijëve në përgjithësi ka rezultuar të jetë sfiduese si rezultat i të dhënave të ndryshme të ofruara nga Federata Ruse dhe Ukraina.

Në mars 2023, Gjykata Ndërkombëtare Penale (GJNP) lëshoi ​​një urdhër arresti për Presidentin Vladimir Putin, pjesërisht për shkak të bazave të arsyeshme për të besuar se ai ishte përgjegjës për deportimin dhe transferimin e paligjshëm të fëmijëve.

Në muajin maj të vitit 2025, Parlamenti Evropian miratoi një rezolutë për kthimin e fëmijëve ukrainas të transferuar me forcë nga Rusia.

Delegatët i përshkruan veprimet ruse si pjesë të një strategjie gjenocidale për të fshirë identitetin ukrainas.

Transferimi dhe deportimi me forcë i fëmijëve është i ndaluar sipas Nenit 49 të Konventës së Katërt të Gjenevës në lidhje me mbrojtjen e personave civilë në kohë lufte.

Sipas Statutit të Romës të GJPN-së, akti i transferimit me forcë mund të kualifikohet si krim lufte sipas Nenit 8(2)(a)(vii), si dhe si akt gjenocidal sipas Nenit 6 (e).

Agresioni rus në Ukrainë është duke vazhduar.

Në fillim të muajit shtator, OKB-ja dënoi një sulm raketor rus në shkallë të gjerë kundër Ukrainës, i cili, përbënte sulmin më të madh që nga pushtimi rus në vitin 2022.

Përdorimi i dronëve është dënuar gjithashtu nga OKB-ja; së fundmi, një sulm me dron rus goditi një karvan humanitar që po dërgonte ndihma në jug të Ukrainës në muajin tetor.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit